"Manchester Yunayted" keyingi 3 ta APL bahsini Kazemirosiz o‘tkazishga majbur. Chunki braziliyalik futbolchi kecha "Kristal Pelas" bilan bahsda to‘g‘ridan-to‘g‘ri qizil kartochka olgandi. VAR tomonidan kuzatilganidan keyin, Kazemiro raqib futbolchisini tomog‘idan bo‘g‘gani ma’lum bo‘ldi. Bosh hakam Andre Mariner unga qizil kartochka ko‘rsatib, maydondan chetlatdi. Aytish kerakki, Erik ten Xag davrida ilk bor "MYU" futbolchilariga qizil ko‘rsatildi. Shuningdek, Kazemiro ham o‘z faoliyatida birinchi marta to‘g‘ridan-to‘g‘ri qizil kartochka oldi. O‘yindan oldingi matbuot anjumanida ten Xag muhim futbolchilarni yo‘qotish borasida fikr bildirgan edi.
"Ha, Kazemiro bizga juda ham kerak. Ammo futbolda hamma narsa sodir bo‘lishi mumkin. Biz buni yaxshi bilamiz. Futbolchilar jarohat olishi mumkin. Bundan ham qocha olmaymiz. Albatta, muvaffaqiyat qozonish uchun sizga asosiy tarkib futbolchilari kerak bo‘ladi. O‘ylaymanki, ikkita Kazemiro yoki ikkita Erkisenga ega bo‘lish imkonsiz ish. Bizda ulardan faqat bittadan bor xolos. Biz "MYU"ni qaytadan qurmoqchimiz. Ammo bu oson bo‘lmaydi. Bunga vaqt kerak. Oldingidek, hamma sovrinlar uchun kurashmoqchi bӯlsak, bizga mavsumlar davomida to‘planadigan tajribalar zarur. Kazemirodan ayrilish esa bizga bu yo‘lda katta muammolar tug‘diradi".
Endilikda 30 yoshli yarim himoyachi "Lester" va "Lids" bilan bo‘ladigan muhim bahslarni o‘tkazib yuborishga majbur. Ammo u Yevropa ligasidagi "Barselona"ga qarshi bahsda maydonga tushishi mumkin. Braziliya terma jamoasi a’zosi "Nyukasl" bilan liga kubogi finaliga qayta oladimi yoki yo‘q, bu hali noma’lumligicha qolmoqda. Quyuda "MYU"ning bu mavsumdagi Kazemiro bilan va usiz qanday natijalar qayd etganiga e’tibor qaratmoqchimiz.
Kazemiro bilan:
O‘yinlar soni: 23 ta
G‘alabalar: 18 ta
Duranglar: 3 ta
Mag‘lubiyatlar: 2 ta
Urilgan gollar: 42 ta
O‘rtacha gollar soni: 1,82 ta
O‘tkazilgan o‘rtacha gollari soni: 0,60
O‘rtacha to‘plangan ochkolar: 2,47
G‘alaba ko‘rsatkichi: 78%
Mag‘lubiyat ko‘rsatkichi: 8,7%
Kazemirosiz:
O‘yinlar soni: 11 ta
G‘alabalar: 7 ta
Duranglar: 0 ta
Mag‘lubiyatlar: 4 ta
Urilgan gollar: 22 ta
O‘rtacha gollar soni: 2,0 ta
O‘tkazilgan o‘rtacha gollar soni: 1,72 ta
O‘rtacha to‘plangan ochkolar: 1,90
G‘alaba ko‘rsatkichi: 63,6 %
Mag‘lubiyat ko‘rsatkichi: 36,4%
ISMATOV J.
