"Barselona" "Atletik" himoyachisi Inigo Martinesning ehtimoliy transferini ko‘rib chiqishda davom etmoqda.
Mavsum yakunida 31 yoshli futbolchi erkin agentga aylanadi va Kataloniya grandi u bilan shartnoma imzolamoqchi edi. Sport.es nashri xabariga ko‘ra, kelishuv amalga oshmay qolishi mumkin, chunki "Barselona" Martinesning jismoniy holatidan xavotirda: markaziy himoyachi noyabr oyidan beri jarohati tufayli maydonga tushmayapti. “Ko‘k anorranglilar” rahbariyati futbolchining og‘ir jarohatdan so‘ng o‘z saviyasini baholash uchun to‘liq tiklanishini kutmoqda.
Inigo Martines joriy mavsumda Bilbaoning “Atletik” klubi safida o‘nta o‘yinda maydonga tushdi. Uning qiymati Transfermarkt ekspertlari tomonidan 18 million yevroga baholangan.
