"Барселона" "Атлетик" ҳимоячиси Иньиго Мартинеснинг эҳтимолий трансферини кўриб чиқишда давом этмоқда.

Мавсум якунида 31 ёшли футболчи эркин агентга айланади ва Каталония гранди у билан шартнома имзоламоқчи эди. Sport.es нашри хабарига кўра, келишув амалга ошмай қолиши мумкин, чунки "Барселона" Мартинеснинг жисмоний ҳолатидан хавотирда: марказий ҳимоячи ноябрь ойидан бери жароҳати туфайли майдонга тушмаяпти. “Кўк анорранглилар” раҳбарияти футболчининг оғир жароҳатдан сўнг ўз савиясини баҳолаш учун тўлиқ тикланишини кутмоқда.

Иньиго Мартинес жорий мавсумда Бильбаонинг “Атлетик” клуби сафида ўнта ўйинда майдонга тушди. Унинг қиймати Transfermarkt экспертлари томонидан 18 миллион еврога баҳоланган.