"PSJ" hujumchisi Lionel Messi Fransiya klubidan boshqa hech kim bilan muzokara olib bormayapti. Bu haqda jurnalist Fabrisio Romano xabar bermoqda.

"Messi hozir faqat "PSJ" bilan muzokaralar olib bormoqda, klub rahbariyati Messining otasi Xorxe bilan uchrashishdi va u ham hozirda "Barselona"dan hech qanday taklif yo‘qligini tasdiqladi", - dedi Romano.

Bundan tashqari, jurnalistning aytishicha, yaqin haftalarda tomonlar yana bir qator uchrashuvlarni o‘tkazishadi va ularda 35 yoshli futbolchining yangi kelishuvi tafsilotlari muhokama qilinadi. Eslatib o‘tamiz, Messining "PSJ" bilan amaldagi shartnomasi shu yilning yoziga qadar tuzilgan.

Argentinalik futbolchi 2021 yildan beri "PSJ" klubi sharafini himoya qilib kelmoqda. Messi joriy mavsumda "PSJ" safida 26 ta o‘yinda maydonga tushib, 15 ta gol urdi va 14 ta golli uzatmani amalga oshirdi.