"Arsenal"ning qishdagi yangi transferlaridan biri bo‘lgan Jorjinyo Frello "Aston Villa"ga qarshi bahsning tanaffusida, Mikel Arteta shogirdlariga nimalar degani haqida aytdi. Italiya terma jamoasi a’zosi to‘pchilarning kechagi g‘alabasida katta rol o‘ynagan edi. Jamoa kambek amalga oshirdi. "Arsenal" birinchi bo‘limdan keyin Olli Uotkins va Filippe Koutinyoning gollaridan keyin 2-1 hisobida ortda qolayotgan edi. Bukayo Saka ham birinchi bo‘limda ajoyib golga mualliflik qildi.
Arteta shogirdlari ikkinchi bo‘limni katta ustunlik bilan boshladi. Oleksandr Zinchenkoning 60 daqiqadagi goli, londonliklarga g‘alaba uchun yana yarim soat vaqt taqdim etadi. Hisob tenglashganidan keyin o‘yin yanada shiddatli ko‘rinish oldi. Xususan, birmingemliklar Eron Ramsdeyl qo‘riqlayotgan darvozaning to‘sinini ikki bor nishonga olishdi. Qo‘shib berilgan daqiqalarda Jorjinyo ajoyib vaziyatga ega bo‘ldi. U tepgan to‘p darvoza to‘siniga tegib, unga intilgan Emi Martines boshi orqali to‘rga borib tushdi. O‘yin tugashiga sanoqli soniyalar qolganida Fabiu Viyeyra uzatgan qulay to‘pni Martinelli Martinesdan holi qolgan darvozaga yo‘lladi. Shu orqali o‘yin 2-4 bilan yakun topdi.
Bahs yakunlangach, Jorjinyo "BT Sports" kanaliga intervyu berdi. Unda italyan futbolchisi shunday deydi: "Bu – Premyer-liga. Shuning uchun biz uni yaxshi ko‘ramiz. Bu dunyodagi eng yaxshi turnir. Men ushbu musobaqani sevaman. G‘alaba jamoa uchun o‘ta muhim edi. Ayniqsa, so‘nggi natijalardan keyin jamoaga ruhiyat baxsh etish zarur bo‘lib turgandi. Negaki, o‘z o‘yinimizni ko‘rsata olmayotgan edik. Tanaffusda murabbiy bizga katta ishonch berdi. Uning gaplaridan keyin biz o‘zimizga kerakli ruhiyatni qaytarib oldik. Bu esa o‘yinimizda o‘zgarish yasadi".
Mikel Arteta ham o‘yin haqida fikr bildirib o‘tdi. U shunday dedi: "Bugun biz xarakter va iroda ko‘rsata oldik deb o‘ylayman. Ikki bor hisobda ortda bora turib, o‘yinni yutib ketish oson ish emas. Bu uchrashuv bizga dars bo‘lishi kerak. Negaki, birinchi bo‘limda oddiy narsalarda xatoga yo‘l qo‘ydik. Agarda shaxsiy sifatlar borasida standartlarimizni yuqoriroq qo‘yib, shunga yarasha harakat qilsak, o‘ylaymanki, istalgan bahsni yutib keta olamiz. Butun o‘yin davomida ustunlik bilan harakat qildik. Bizga g‘alaba uchun birgina mo‘jiza zarur edi va buni Jorjinyo namoyish etib berdi. Ha, yana bir gap, Jorjinyo shunday ajoyib zarbaga egaligini bilmasdim. Agarda yetakchi bo‘lishni istasangiz, har qanday bahsni, har qanday uslubda yutib ketishni o‘rganishingiz kerak".
Ushbu g‘alaba "Arsenal"ni yana APL yetakchisiga aylantirdi. To‘pchilarning eng katta raqibi bo‘lgan "Manchester Siti" o‘z o‘yinida "Nottingem" maydonida durang qayd etgandi (1-1).
Eslatib o‘tamiz, "Arsenal" keyingi o‘yinini "Lester Siti"ga qarshi, safarda o‘tkazadi.
ISMATOV J.
