Yevropa chempionlar ligasining 1/8 finalida “Liverpul” o‘z maydonida “Real”ga 2:5 hisobida mag‘lub bo‘ldi.

Madridliklar ketma-ket 5-o‘yinida g‘alaba qozondi. “Malyorka”ga uchralgan mag‘lubiyatdan so‘ng Karlo Anchelotti shogirdlari so‘nggi 5 o‘yinda to‘plar nisbatini 20:6 ko‘rinishiga olib keldi.

“Liverpul” 14 yildan buyon “Real”ni mag‘lub eta olmayapti. “Qaymoqranglilar” ketma-ket 7 o‘yindan buyon mersisaydliklarga mag‘lub bo‘lmayapti — 6 ta g‘alaba va bitta durang. Jamoalar o‘rtasidagi o‘zaro o‘yinlardagi to‘plar nisbati — 16:4.

“Qizillar”ning Madrid klubi ustidan so‘nggi g‘alabasi 2009 yil mart oyida sodir bo‘lgandi.

“Liverpul” o‘z tarixida ilk bor Yevrokuboklarda darvozasidan 5 ta gol olib chiqdi. Undan tashqari jamoa XXI asrda uchinchi bor “Enfild”da 5+ gol o‘tkazib yubordi. Bunga qadar “Arsenal” 2007 yilda (6:3) va 2019 yilda (5:5) mersisaydliklar maydonida besh va undan ortiq gol urgan.

“Liverpul” bosh murabbiyi Yurgen Klopp “Real”ga qarshi so‘nggi 5 o‘yinning 4 tasida mag‘lubiyatga uchradi. Germaniyalik mutaxassis 2014 yil “Borussiya D” ustozi sifatida madridliklarni 2:0 hisobida taslim etgan. Shundan buyon Klopp “Qirollik klubi”dan mag‘lubiyat alamini tatib ko‘rmoqda.

Mersisaydliklar a’zosi Muhammad Saloh jamoa tarixida Yevrokuboklarda eng ko‘p gol urgan futbolchiga aylandi. Misrlik futbolchining gollari soni 42 taga yetdi. Bunga qadar rekord “Liverpul” safida Yevrokuboklarda 41 ta gol urgan Stiven Jerrardga tegishli edi.

Shuningdek, Saloh ingliz jamoasi tarixida musobaqada 13 ta golli uzatmani amalga oshirgan ilk futbolchi bo‘ldi.

“Real” hujumchisi Karim Benzema dubl qayd etdi va YECHLda ketma-ket 18-mavsumida gol urmoqda. Fransuz Lionel Messining rekordini takrorladi. Argentinalik futbolchi ham ketma-ket 18 mavsumdan buyon ushbu musobaqada gol urib kelmoqda. Ikkala futbolchi Chempionlar Ligasida 2005/06 yilgi mavsumdan buyon ishtirok etib kelyapti.