«PSJ» himoyachisi Serxio Ramos Ispaniya terma jamoasidagi faoliyatini yakunlaganini ma’lum qildi. 36 yoshli futbolchi xalqaro futbolni o‘z ixtiyori bilan tark etmasligini ochiq aytdi.
«Bugun ertalab hozirgi bosh murabbiy menga qo‘ng‘iroq qildi va men qanday o‘ynashimdan va faoliyatim qanday rivojlanishidan qat’i nazar, uning rejalariga kiritilmasligimni aytdi. Men uzoq davom etishini xohlagan sayohat o‘zim kutmagan tarzda yakunlandi», - deb yozdi Ramos ijtimoiy tarmoqda.
Bayonotning davomida Ramos xuddi murabbiyni qoralagandek, yosh shunchaki raqam ekanligini ta’kidladi. «PSJ» himoyachisi Luka Modrich, Lionel Messi va Pepe misollarini ko‘rsatdi.
«Afsuski, men uchun bunday bo‘lmadi, chunki futbol har doim ham adolatli bo‘lavermaydi. Men buni qabul qilishim kerak», - dedi Ramos.
Serxio Ramos Ispaniya terma jamoasi safida 180 ta o‘yin o‘tkazib, 23 ta gol urgan va 8 ta golli uzatmaga mualliflik qilgan.
Eslatib o‘tamiz, so‘nggi bir necha yil ichida Luis Enrike Serxio Ramosni Ispaniya terma jamoasiga chaqirmagandi. 2022 yilgi jahon chempionatidan keyin jamoani Luis de la Fuente qabul qilib oldi.
