«ПСЖ» ҳимоячиси Серхио Рамос Испания терма жамоасидаги фаолиятини якунлаганини маълум қилди. 36 ёшли футболчи халқаро футболни ўз ихтиёри билан тарк этмаслигини очиқ айтди.
«Бугун эрталаб ҳозирги бош мураббий менга қўнғироқ қилди ва мен қандай ўйнашимдан ва фаолиятим қандай ривожланишидан қатъи назар, унинг режаларига киритилмаслигимни айтди. Мен узоқ давом этишини хоҳлаган саёҳат ўзим кутмаган тарзда якунланди», - деб ёзди Рамос ижтимоий тармоқда.
Баёнотнинг давомида Рамос худди мураббийни қоралагандек, ёш шунчаки рақам эканлигини таъкидлади. «ПСЖ» ҳимоячиси Лука Модрич, Лионель Месси ва Пепе мисолларини кўрсатди.
«Афсуски, мен учун бундай бўлмади, чунки футбол ҳар доим ҳам адолатли бўлавермайди. Мен буни қабул қилишим керак», - деди Рамос.
Серхио Рамос Испания терма жамоаси сафида 180 та ўйин ўтказиб, 23 та гол урган ва 8 та голли узатмага муаллифлик қилган.
Эслатиб ўтамиз, сўнгги бир неча йил ичида Луис Энрике Серхио Рамосни Испания терма жамоасига чақирмаганди. 2022 йилги жаҳон чемпионатидан кейин жамоани Луис де ла Фуэнте қабул қилиб олди.
