Xalqaro boks assosiasiyasining (IBA) etika bo‘yicha mustaqil bo‘linmasi (BIIU) ba’zi mamlakatlarning sport mutasaddilari tomonidan IBA nizomi hamda intizom axloq kodeksini buzganligi haqidagi shikoyatni ko‘rib chiqishni boshladi, deya xabar beradi assosiasiya rasmiy sayti.
 
Gap boks bo‘yicha Jahon Chempionatlarini boykot qilishga chaqiriqlar va ayrim mamlakat sportchilarining to‘g‘ridan-to‘g‘ri ishtirokini taqiqlashlar haqida ketmoqda. Qayd etib o‘tish joiz, ayollar o‘rtasidagi Jahon Chempionati 15—31 mart kunlari Hindistonda, erkaklar o‘rtasidagi Jahon Chempionati 1—14 may kunlari O‘zbekistonda bo‘lib o‘tadi.

Quyidagi milliy federasiyalar rahbarlariga nisbatan intizomiy ish ochilgan: Mayk Makeyti (AQSH), Rayan O‘shi (Kanada), Mark Shimak (Chexiya), Pyer-Aksel Syoxolm (Shvesiya) va Stiv Hartli (Yangi Zelandiya). Shuningdek, BIIU boshqa federasiyalar rahbarlarining ham musobaqalarni boykot qilishdagi rolini tekshiradi.

Eslatib o‘tamiz, AQSH, Shvetsiya, Irlandiya, Chexiya va Kanada boks federasiyalari Hindiston (ayollar o‘rtasida) va O‘zbekistonda (erkaklar o‘rtasida) bo‘lib o‘tadigan boks bo‘yicha Jahon Chempionatiga boykot e’lon qilgani xabar qilingandi. Keyinchalik Ukraina va Norvegiya ham ularga qo‘shilgan.

Xalqaro boks assosiasiyasi joriy yil Hindistonning Nyu-Dehli shahrida bo‘lib o‘tadigan ayollar o‘rtasidagi va Toshkentda o‘tkaziladigan erkaklar o‘rtasidagi jahon chempionati Olimpiada lisenziyalarini taqdim etishini ma’lum qilgandi.

BIIU barcha axloqiy va intizom masalalar (shu jumladan, manfaatlar to‘qnashuvi) bilan shug‘ullanish, saylovga nomzodlar haqida ma’lumotlarni tekshirish, o‘qitish va rivojlantirish xizmatlarini ko‘rsatish uchun 2022 yilda tashkil etilgandi.