O‘zbekiston yoshlar terma jamoasi sardori Umarali Rahmonaliyev Janubiy Koreyaga qarshi bo‘lib o‘tgan yarim final bahsidan keyin o‘z fikrlari bilan o‘rtoqlashdi.

"O‘zbek xalqini, yurtimizni bugungi g‘alaba bilan tabriklayman. Inshoolloh, bu davomli bo‘lsin. Oldlimizda yana bitta o‘yin turibdi. Borimizni berib, muxlislarni xursand etishga va mana shunday hissiyotlarni davom ettirishga harakat qilamiz. Finalda bor kuch va g‘ayratimizni ishga solamiz. Bizni qo‘llab-quvvatlab turgan muxlislarga katta rahmat aytaman. Ular biz borlarini berib muxlislik qilishdi. Biz ham bunga tayyormiz va finalda borimizni beramiz.

Koreyaning o‘yinlarini o‘rganib chiqqan edik. Murabbiylarimiz o‘yinni qanday olib borishni bizga tushuntirishgan edi. Qaysi daqiqada qanday o‘zgarishlar qilishni batafsil o‘rgatishgan edi. Biz esa murabbiyimiz bergan ko‘rsatmalarga amal qildik. Biz o‘yin bo‘yicha ham g‘alabaga haqli edik, deb o‘ylayman. Penaltilar seriyasida esa Alloh bizga omadni berdi. Xudoga shukr, muxlislar oldida yuzimiz yerga qarab qolmadi. Finalda ham yuzimiz yorug‘ bo‘ladi, deb umid qilaman. Hammaga rahmat", — dedi Umarali.