"Dinamo" bosh murabbiyi Vadim Abramov Pro liganing birinchi turidan o‘rin olgan "Mash’al"ga qarshi uchrashuvdan so‘ng fikrlarini bildirib o‘tdi.

- O‘yin haqida

- Birinchi navbatda mavsumning ochilish o‘yini bilan barchani, muxlislarni tabriklayman. Ilk tur doim qiyin o‘tgan. Chempionat boshlanishi 2-3ta o‘yin og‘ir bo‘ladi. Keyinchalik moslashib ketiladi. Natijamiz yaxshi, lekin o‘yinimiz borasida kamchiliklarimiz bor. "Mash’al" yaxshi jamoa, ular bilan qishki o‘quv-mashg‘ulot yig‘inlari doirasida ikki marotaba uchrashgan edik. O‘yinga bo‘lgan rejasi borligi ma’lum edi. Bizni qarshi hujumda ushlashgandi. Bugun ham shunday bo‘lib chiqdi. Futbolchilarga rahmat aytaman, qanday o‘ynash kerak bo‘lsa, shunday harakat qilishdi.

- Legionerlarning harakatidan qoniqdingizmi?

- Legionerlar yaxshi to‘p tepishdi. O‘zlarini ko‘rsata olishdi. Biroq 3:0 vaqtida futbolchilar biroz noto‘g‘ri o‘ynashdi. Bu xavotir oladigan jihat bo‘ldi. Birinchi bo‘limda ham vaziyatlar bo‘ldi, shoshildik. "Mash’al" bilan hammaga qiyin kechishi aniq. Natijadan mamnunman.

- Jamoa oldiga qanday maqsad qo‘yilgan?

- Endi birinchi o‘yin yakunlandi. Bu haqda gapirishga erta, deb o‘ylayman. Hammasini vaqt ko‘rsatadi, kamroq gapirib, ko‘proq ishlashimiz kerak.