O‘tgan yili mamlakatimiz prezidentining farmoniga muvofiq Qashqadaryo viloyatidagi Chiroqchi tumani negizida Ko‘kdala tumani tashkil etildi.
Navqiron tuman ahli sog‘lom turmush tarziga oshufta el. Bu yerda biron bir tadbir yoki tantanali marosim yo‘qki uloq-ko‘pkari, kurash, shuningdek, futbol musobaqalarisiz o‘tsa. Shuning uchun bo‘lsa kerak keyingi yillarda bu yerdan «charm to‘p»ga oshno yangi avlod kamol topayapti. Unga monand ko‘p sonli muxlislar ham futboldan zavq-shavq olishmoqda. Shulardan biri Orifjon Abdullayevdir.
- Orifjon, Ko‘kdala ahlining futbolga shaydoligini nima bilan izohlaysiz?
- Ko‘kdalaga ayni bahorning shu kezlarida kelsangiz ko‘nglingiz yayraydi. Yashillikka burkangan qir-adirlar, ko‘zni quvnatadigan lola qizg‘oldag‘u chuchmomolardan bahra olasiz. Birgina so‘nggi oylarda bunyod etilgan 20dan ortiq sun’iy qoplamali futbol maydonlaridagi yosh-yalanglarning sho‘x-shodon ovozi ko‘ngillarga orom, dillarga huzur-halovat bag‘ishlaydi.
- Shunday yam-yashillikda sun’iy qoplamali maydonga ne hojat?
- To‘g‘ri, biz bahorda tabiiy maydonlarda to‘p tepib, qish, yoz kuz oylarida sun’iy qoplamali maydonlardan foydalanamiz. Axir qishning ayni chillasi, saratonning issig‘i-yu, kech kuzning salqin havosida koptok ortidan yugurishga nima yetsin.
- Shu tuman qishloqlaridan katta futbolga kirib kelganlar ham anchagina ekan.
- Nimasini aytasiz. Yoshligimizdan qir-adirlarda to‘p tepib voyaga yetdik. O‘z vaqtida «Mash’al», «Nasaf»da o‘ynagan Kenja To‘rayev, Samandar Shodmonov, Oybek To‘laganov, Abduvali To‘rayev, Nurilla Qo‘ng‘urovlar ham qishloq futbolidan katta arenaga chiqishgan. Erta tongda futbol o‘ynashning gashtini o‘z vaqtida chuqur his etganmiz.
- Sizni ham Moylijar qishlog‘i jamoasining tinib tinchimas mohir hujumchisi deyishadi.
- Unchalik emas-ov. Har holda qishloqdagi tengdoshlarimizni to‘plab o‘yinlar tashkil etib turamiz. Kasbim taqazosiga ko‘ra qashqadaryo aloqa terma jamoasida 10 yil o‘ynadim. Qarshidagi havaskorlar ligasining «Brossmed» jamoasi a’zosiman. Ayni paytda Navro‘z bayramiga «qishlog‘imiz or-nomusi uchun» turniriga tayyorgarlik ko‘rayapmiz. Unda 15dan ortiq jamoa ishtirok etadi. Shular negizida tumanimiz terma jamoasini shakllantiramiz.
- Farzandlaringizdan ham futbolga mehr qo‘ygani bormi?
- To‘rt nafar farzandim bor. To‘qqiz yoshli o‘g‘lim Umar «Nasaf» maxsus futbol maktabiga qatnaydi. Murabbiy Anvar Davletshindan «charm to‘p»ning sir-asrorlarini o‘rganmoqda.
- Bundan ko‘rinib turibdiki oiladagi futbolga bo‘lgan ishtiyoq tuman darajasida ham o‘zining sezilarli natijasini berayapti.
- Bo‘lmasamchi, tumanimiz hokimi Xurram aka Jo‘rayev futbolga mehr qo‘ygan rahbarlardan. U kishi o‘z vaqtida «Nasaf» PFKda prezident bo‘lib ham faoliyat ko‘rsatgan. Futbolni obdon tushunadi. «Nasaf»ning g‘alabalaridan ilhomlanib, mag‘lubiyatidan afsus chekkanining guvohi bo‘lganman. «Bunyodkor», shashti baland «Olimpik» ham rahbarimizning e’tiborida. «Navbahor» kuchaymoqda, «Nasaf», «Paxtakor», «AGMK»lar OCHLga shaylanayapti. Bu O‘zbekiston faxri, milliy, olimpiya terma jamoamiz poydevori deb bizni yangi davonlar sari chorlaydi. «Ko‘kdala nomi o‘zbek futbolida porlashi kerak» deb yuksak maqsadlar sari marrani baland olishga intilayapmiz.
Husan TEMIROV suhbatlashdi
