Himoyachi Niko Shlotterbek va yarim himoyachi Kay Xavers Germaniya terma jamoasiga Belgiyaga qarshi bo‘lib o‘tadigan o‘rtoqlik uchrashuvida yordam bera olmaydi.
Germaniya terma jamoasi matbuot xizmati xabariga ko‘ra, Xavers grippga chalingan, Shlotterbek esa chap son mushaklari shikastlangani aniqlangan. Har ikki futbolchi terma jamoa joylashgan joyini tark etgan.
Germaniya terma jamoasi va Belgiya terma jamoasi o‘rtasidagi o‘rtoqlik uchrashuvi 28 mart, seshanba kuni bo‘lib o‘tadi. Uchrashuv Toshkent vaqti bilan 23:45 da boshlanishi rejalashtirilgan.
Avvalroq, Germaniya terma jamoasi Peruga qarshi sinov o‘yinini o‘tkazib, 2:0 hisobida g‘alaba qozongandi.
