O‘zbekiston U20 terma jamoasi bugun Rossiya yoshlariga imkoniyatni boy berdi — 0:2.

Bellashuvga nisbatan ayrim futbol muxlislarining reaksiyalari salbiy, buni tushunish mumkin. Biroq ayrim faktorlarni ham ko‘zdan qochirmaslik kerak:

— har qanday katta g‘alabadan keyingi tezkor o‘rtoqlik o‘yini uchun motivasiya topish juda qiyin masala, aytaylik, bizning yigitlar allaqachon mundial havosi bilan yashashga o‘tdi va katta g‘alaba ta’siridan to‘la chiqib ulgurmadi;

— qit’a chempionligini qo‘lga kiritgan optimal tarkib bugungi o‘yinda ishtirok etgani yo‘q, ayrim yetakchi futbolchilar xorijdagi o‘z klublari ixtiyoriga jo‘nab ketgan;

— murabbiy bugun aralash tarkibni sinab ko‘rdi va to‘g‘ri qildi, siz bilgan Abboslar ham zaxiradan o‘yinga qo‘shildi;

— bugun terma jamoamiz ko‘nikkani kabi muxlis to‘la stadionda to‘p surgani yo‘q, juda katta atmosferadan keyinoq huvillagan stadionga chiqib kelish oson kechmaydi, murabbiylar endi jamoani mana shunga ko‘niktirishi kerak. Chunki Osiyo kubogidagi g‘alabaning kamida teng yarmi muxlislarniki, yigitlarga ular har kimdan ko‘ra ko‘proq motivasiya bera olishdi.

Hozir hammasini bir boshdan boshlash kerak bo‘ladi. Asosiy yigitlar o‘z klubiga juda zarur, bir qancha muddatdan keyin ular yana terma jamoa uchun yonishni boshlaydi.

Diyor Imomxo‘jayev.