Superliganing 5-turidan o‘rin olgan OKMK – “Navbahor” (2:1) o‘yinidan keyingi matbuot anjumanining birinchi qismida namanganliklar bosh murabbiyi Samvel Vyacheslavovich Babayan ishtirok etib, OAV xodimlariniing savollariga javob berdi.

- Bugungi o‘yin haqidagi fikrlaringiz?

- So‘nggi vaqtlarda OKMK va “Navbahor” jamoalari o‘rtasidagi o‘yinlar milliy chempionatimiz bezagi bo‘lib kelmoqda. Bugungi bahsda g‘alabani qo‘ldan chiqardik deb o‘ylayman. Hisobda oldinga chiqib olganimizdan so‘ng, futbol o‘ynamay qo‘ydik va g‘alabani qo‘ldan chiqardik. Bugungi uchrashuv bizga saboq bo‘lishi kerak.

- Ko‘p hakamlardan ogohlantirish olasiz, o‘zbek hakamlariga qay darajada ishonasiz?

- Hakamlarni muhokama qilmayman. Bu oddiy emosiyalar, o‘yin vaqtida paydo bo‘ladi va keyin yo‘qoladi.

- “Navbahor” ikki marotaba kuchli raqiblarga qarshi o‘ynadi va o‘sha o‘yinlarda imkoniyatni boy berdi. Jamoada ruhiy tomonlama muammo bordek. Bunga “Navbahor”ning o‘zidan kuchsizroq raqiblarni oson mag‘lub etayotganligi sabab bo‘lyaptimi?

- Yaxshi savol bo‘ldi. Avvalambor ta’kidlab o‘tishim kerakki, OKMK bilan bo‘ladigan uchrashuvlar o‘zimizning haqiqiy kuchimizni ko‘rib olish uchun imkoniyat. Bugungi uchrashuvda ikki nafar asosiy futbolchimiz Davron Hoshimov va Jasur Yaxshiboyevlar jamoaga yordam bera olishmadi.Ushbu holat ham jamoa o‘yiniga ta’sirini o‘tkazdi. Lekin bugun yangi o‘yinchilarni sinab olishga imkoniyat bo‘ldi, sifat yetishmadi, deb o‘ylayman, xolos.

O‘z oldiga katta maqsadlar qo‘ygan jamoa bunday o‘yinlarda birinchi daqiqadan boshlab, so‘nggi soniyalargacha diqqatni jamlab o‘ynashi kerak. O‘yinimizni tahlil qilib chiqamiz" - dedi Babayan.