“Neftchi” – “Andijon” (3:1) o‘rtasidagi nazorat uchrashuvidan keyin andijonliklar bosh murabbiyi Aleksandr Xomyakov quyidagilarni aytdi:

"Derbi haqida o‘ylaganimiz yo‘q. Bu o‘rtoqlik emas, nazorat uchrashuvi edi. Albatta, o‘yindagi ayrim kamchiliklar xususida futbolchilarimiz bilan bafurja gaplashib olamiz. Uchrashuvni kutilgan tarzda o‘tkazdik, desam ham bo‘laveradi. Mana shunday sparring bilan o‘yin o‘tkazilganidan ko‘nglim to‘lganini alohida aytishim joiz.

Bundan keyin endi asosiy e’tiborni “So‘g‘diyona”ga qarshi o‘tadigan o‘yinga qaratamiz.

Har bir futbolchi jamoada o‘z o‘rniga ega. Har bir o‘yinchining klub uchun ahamiyat kasb etishi bu inkor etib bo‘lmaydigan holatdir. Tabiiyki, har bir jarohat sababli futbolchining noma’lum vaqtga safdan chiqishi jamoa o‘yiniga o‘z ta’sirini o‘tkazmasdan qolmaydi. Lekin jarohatlardan hech kim kafolatlanmagan. Umid qilamizki, jarohatlangan futbolchilarimiz tez orada safga qaytishadi. Ularning tezroq oyoqqa turishlarini va umumiy guruhga qo‘shilgan holda mashg‘ulotlarga qaytishini intiqlik bilan kutib qolamiz.

Nazorat uchrashuvi aynan “So‘g‘diyona”ga qarshi bo‘lajak bahsga tayyorgarlik vazifasini o‘tadi. Tayyorgarlik kutilgan darajada, reja asosida davom etyapti, - deydi Xomyakov.

“Andijon” matbuot xizmati.