Kamtarin «Luton» klubi joriy mavsum Chempionshipdan APLga ko‘tarilishga ancha yaqin.

Agar chindan ham, shunday bo‘lsa, Angliya chempionati elit divizioni jamoalarining o‘ta odmi stadionda o‘ynashiga to‘g‘ri keladi. «Luton» Angliyada sof inglizcha arenasini saqlab qolgan sanoqli klublardan biridir.

«Luton» Chempionshipda qatorasiga 12ta o‘yindan buyon mag‘lubiyatga uchramayapti, jamoa bu seriya davomida 8ta g‘alaba qayd etdi. Jumladan, «shlyapalar» APL yo‘llanmasi uchun to‘g‘ridan-to‘g‘ri raqobatchilaridan biri - «Midlsbro»ga qarshi kechgan oxirgi o‘yinda 2:1 hisobida irodali g‘alabani tantana qilishdi. Xullas, Rob Edvards boshqarayotgan jamoa APLning 3-yo‘llanmasi taqdiriga oydinlik kiritib beradigan «pley-off» turniriga ajoyib sport formasida yaqinlashmoqda.

Ayni payt Chempionship turnir jadvalining 3-pog‘onasida borayotgan «Luton» yakunda APLga chiqish missiyasini muvaffaqiyatli ado etsa, unda Angliya elit divizioni o‘yinlari g‘aroyib arenaga ham ko‘chadi. Bunaqasi anchadan beri ko‘rilmagan Angliya chempionati oliy darajasida. Old skul - eski maktab namunasi. Qolaversa, «Keniluert Road» o‘z bag‘riga atigi 10 mingdan ko‘proq muxlisni oladi, xolos.