Bugun Superliganing 9-tur bahslariga start beriladi. Ertaga esa “Andijon” Farg‘onadagi “Istiqlol” stadionida Jizzaxning “So‘g‘diyona”sini qabul qiladi.

“So‘g‘diyona” 7 ta turdan keyin 1 g‘alaba, 2 durang va 4 mag‘lubiyat qayd etib, 5 ochko bilan turnir jadvalida 11-pog‘onada bormoqda.

Yodingizda bo‘lsa, “So‘g‘diyona” Yorqin Nazarov boshchiligida chempionatga kirishdi. 4-turda Namanganda “Navbahor”ga 3:0 hisobida imkoniyat boy berilgach, Nazarov iste’foga chiqarildi va o‘rniga “Bunyodkor”ning sobiq bosh murabbiyi Ivan Boshkovich tayinlandi.

Bevosita “Andijon” va “So‘g‘diyona” klublari o‘rtasidagi o‘zaro uchrashuvlar tarixiga to‘xtaladigan bo‘lsak, ertangi bahs jamoalarning 45-to‘qnashuviga aylanadi.

Bungacha bo‘lib o‘tgan 44 ta bahsning 16 tasida “Andijon” g‘alaba qozongan. “So‘g‘diyona” esa 17 ta uchrashuvda ustunlikka erishgan. Yana 11 ta o‘yinda kuchlar teng kelib qolgan. To‘plar nisbati 62\63 jizzaxliklar foydasiga. Ko‘rib turganingizdek, statistik raqamlar bo‘yicha imkoniyatlar deyarli teng.

Jamoalar so‘nggi marta 2021 yilgi mavsumda kuch sinashishgan. Birinchi davrada Jizzaxda mezbonlar 4:1 hisobida g‘alaba qozongan, Andijonda esa hisob ochilmagan – 0:0. “Andijon” “So‘g‘diyona”ni so‘nggi bor 2016 yilgi chempionatda mag‘lub etgan. 23 aprel sanasida Andijonda o‘tkazilgan bahsda yirik 3:0 hisobi qayd etilgan.