Italiya A Seriyasining 33-turida “Udineze” o‘z maydonida 4 may, payshanba kuni “Napoli”ni qabul qildi.

Uchrashuvning 13-daqiqasida “Udineze” futbolchisi Sandi Lovrich gol urib, hisobni ochdi. 52-daqiqada “Napoli” hujumchisi Viktor Osimxen hisobni tenglashtirdi va durang natija uchrashuv yakunigacha saqlanib qoldi.

Mazkur natijadan keyin Neapol klubining ochkolari 80 taga yetdi va jamoa mavsum yakunlanishiga 5 tur qolganda muddatidan oldin Italiya chempionligini qo‘lga kiritdi.

“Napoli” bungacha 33 yil davomida Skudettoga ega chiqolmagandi. Neapolliklar o‘z tarixida uchinchi marta Italiya chempioniga aylandi.

A seriya, 33-tur bahsi
4 may, payshanba
“Udineze” — “Napoli” 1:1
Gollar: 1:0 – 13 Lovrich, 1:1 – 52 Osimhen.
“Udineze”: Silvestri, Exizibue (Ebosele, 82), Rodrigo Bekao, Peres, Biyol, Udoji (Zegelar, 74), Pereyra, Uolas, Lovrich (Arslan, 78), Samarjich (Toven, 82), Nestorovski.
“Napoli”: Meret, Di Lorenso, Rahmani, Kim Min Chje, Oliveyra, Lobotka, Zambo-Angissa, Ndombele (Zelinski, 64), Elmaz, Kvarasxeliya (Losano, 86), Osimxen.
Ogohlantirish: Exizibue (17)