“Andijon” ertaga Toshkentda OKMK klubiga qarshi maydonga chiqadi.

Oxirgi marta bu jamoalar o‘tgan yili Andijondagi “Bobur Arena” stadionida to‘qnashishgani yodingizda bo‘lsa kerak. O‘shanda “Andijon” pro liga qatnashchisi sifatida OKMKga qarshi maydonga tushgan va bu O‘zbekiston Kubogi chorak finali doirasida o‘tkazilgan bo‘lib, unda 0:2 hisobida olmaliqliklar g‘alaba qozongan.

Umuman olganda, bu ikki jamoalar O‘zbekiston chempionatida 22 bor maydonda kuch sinashishgan. Shularning 14 tasida OKMK g‘olib chiqqan. “Andijon” esa 4 ta uchrashuvda raqibini mag‘lub etgan. Yana 4 ta o‘yinda kuchlar teng kelgan. To‘plar nisbati 45-27, OKMK foydasiga.

Jamoalarning Superligadagi so‘nggi uchrashuvi 2021 yilgi chempionatga to‘g‘ri keladi. O‘shanda har ikkala bahsda OKMK bir xil – 3:2 hisobi bilan g‘alaba qozongan.

"ANdijon" oxirgi bor 2019 yili OKMK maydonida 2:2 hisobida durang o‘ynagan.

Yuqorida e’tibor bergan bo‘lsangiz, “Andijon” hisobida 4 ta g‘alaba bo‘lib, barchasini o‘z uyidagi uchrashuvlarda qo‘lga kiritgan. Oxirgi marta “Burgutlar” 2011 yili olmaliqliklar ustidan g‘alaba qozongan bo‘lib, o‘shanda 1:0 hisobi qayd etilgan.

“Andijon” matbuot xizmati.