"Barselona" vise-prezidenti Rafa Yuste "PSJ" hujumchisi Lionel Messining Kataloniya klubiga qaytishiga umid bildirdi.
"Men Messining qaytishini xohlayman. "Barselona" muxlisi sifatida men undan klubga bergan hamma narsasi uchun minnatdorman, chunki u akademiya tarbiyalanuvchisi va jamoaga doimo to‘g‘ri munosabatda bo‘lgan. Yaxshi hikoyalar yaxshi yakunlanishi kerak. Messi qaytsa hammamiz xursand bo‘lamiz. Albatta, hammasi uning qaroriga bog‘liq, lekin biz uni keyingi mavsumda ko‘rsak xursand bo‘lamiz", - deya Yuste so‘zlarini keltiradi Mundo Deportivo.
Messi "Barselona" tarbiyalanuvchisi, u 2000 yilda klub akademiyasiga ko‘chib o‘tgan va 2004 yilda asosiy jamoada debyut qilgan. "Ko‘k-anorranglilar" bilan birgalikda argentinalik hujumchi 35 ta chempionlikni qo‘lga kiritgan.
2021 yilning yozida Messi “Barselona”ni tekinga tark etdi va “PSJ”ga o‘tdi. 35 yoshli argentinalikning parijliklar klubi bilan shartnomasi 2023 yilning iyun oyi oxirigacha amal qiladi.
