Superkompyuter "MYU"ning bu yozdagi xaridlari haqida o‘z taxminlarini berdi. Unga ko‘ra, "qizil iblislar" to‘qqizta futbolchini transfer qilishi mumkin. Klub o‘tgan mavsumni Erik ten Xag bilan muvaffaqiyatli yakunlagan edi. Mankunianliklar YECHLga yo‘l oldi, 3 iyun kuni esa jamoa ikkinchi titulini qo‘lga kiritishi mumkin. Buning uchun "Manchester Siti" mag‘lub etilishi lozim. "Manchester Yunayted"ni oldinda qizg‘in yoz kutmoqda. Tarkibga markaziy hujumchi zarur bo‘lib turibdi. "MYU" Krishtianu Ronaldu o‘rnini to‘ldira olmagandi. Shuningdek, ten Xagga yarim himoya uchun yuqori darajaga ega yulduzlar zarur. Quyida sun’iy ong tomonidan taxmin qilingan futbolchilar ro‘yxati taqdim etiladi.
Xarri Keyn
Angliya va "Tottenxem" sardori bu yozdagi "MYU"ning asosiy nishoni sanaladi. Klubga to‘purar zarur. Shu sababdan Keyn xaridi amalga oshishi kutilmoqda. Ammo bu ish oson bo‘lmaydi. Negaki, "Tottenxem" raisi Daniel Levi bilan kelishish qiyin masala. U Keynni kamida 100 million funtga sotadi.
Meyson Maunt
"Chelsi" yarim himoyachisining "Stemford Brij"dan ketadi degan mish-mish anchadan beri mavjud. Klub va futbolchi yangi shartnoma borasida kelisha olmagani aytiladi. Erik ten Xagning shaxsan o‘zi Angliya terma jamoasi a’zosiga qiziqish bildirmoqda. U uchun kamida 55 million funt talab qilinadi.
Deklan Rays
"Vest Xem" sardori o‘z shartnomasining tugashiga bir yil qolganida jamoadan ketishi kutilmoqda. 24 yoshli yarim himoyachining "Arsenal"ga o‘tishi bilan bog‘liq xabarlar mavjud. U, shuningdek, "Bavariya" uchun ham ustuvor maqsad sanaladi. Rays ayni damda 90 million funt atrofida baholanmoqda. "MYU" esa uni o‘z tomoniga og‘dirishi zarur.
Aleksis Makallister
Jahon chempionatida zafar quchgan futbolchi, yozda o‘z klubini almashtirishi ayon bo‘ldi. U "Brayton"ga YELga chiqish uchun katta yordam bergan edi. Makallister uchun "Liverpul" va "MYU" birdek raqobat qiladi.
Jud Bellingem
19 yoshli talant yozgi transferlar oynasida eng katta e’tiborga molik futbolchiga aylanishi kutilmoqda. Ammo uning ko‘chishi, katta ehtimol bilan APLga bo‘lmaydi. Bellingem "Real"ga o‘tishga yaqin turibdi. "MYU" esa bu kurashda ancha qiynaladi.
Frenki De Yong
"Manchester Yunayted" niderlandiyalik futbolchini o‘tgan yozda ham ta’qib qilgandi. Ammo "Barselona" De Yongni sotmagan. Hozir ham bu boradagi vaziyat o‘zgargani yo‘q. De Yong La-ligada baxtli va Xavi jamoasida muhim figura bo‘lib turibdi. Shu sababli 25 yoshli yulduzni Kataloniyadan olib kelish o‘ta murakkab kechadi.
Yuri Tilemans
Belgiya terma jamoasi a’zosi Chempionshipga yo‘l olgan "Lester"ni erkin agent sifatida tark etadi. U o‘tgan yili "Arsenal"ga o‘tishga harakat qilgandi. Tilemans uchun "Manchester Yunayted" hozir jiddiy da’vogarga aylandi. U uchun "Nyukasl", "Liverpul" va "Aston Villa" ham kurashib ko‘radi.
Nikolo Barella
Yarim himoyachi "Inter"ning Italiya kubogiga erishishi va YECHL finaliga chiqishida muhim rol o‘ynagan edi. Italyan futbolchisiga "Liverpul" qiziqish bildirgan. Ammo "MYU" Barellani o‘z tomoniga og‘dirishga harakat qiladi.
Denzel Dyumfris
Niderlandiya terma jamoasi a’zosi o‘tgan yozda "Chelsi"ga o‘tishi ham mumkin edi. Ammo transfer muvaffaqiyatsizlikka uchradi. 27 yoshli futbolchi "Inter" uchun muhim ekani sababli "MYU" Denzelni sotib olishga ancha qiynaladi.
Superkompyuterning taxminlari yuqoridagilardan iborat.
ISMATOV J.
