Insayder Fabrisio Romano "Inter" o‘z hujumchisi Edin Jeko bilan xayrlashayotganini e’lon qildi.

Milan klubi 37 yoshli futbolchi bilan shartnomani uzaytirish borasida kelisha olmadi, amaldagi kelishuv esa iyun oyi oxirida tugaydi. Hozircha hamkorlikni davom ettirish bo‘yicha muzokaralar olib borilmayapti. Romanoning yangilangan ma’lumotlariga ko‘ra, bosniyalik futbolchi yaqin kunlarda "Inter"ni erkin agent sifatida tark etishi mumkin. Jeko bilan Turkiyaning "Fenerbaxche" klubi va Saudiya Arabistoni chempionati klublari qiziqish bildirmoqda.

Edin Jeko “Inter” safida 2021 yilning avgustidan buyon o‘ynab kelmoqda. U “neradzurrilar” safida 101 ta o‘yinda maydonga tushib, 31 ta gol va 15 ta golli uzatmani amalga oshirgan.