"Aston Villa" hujumchisi Olli Uotkins "Manchester Yunayted"ning hujumni kuchaytirishi mumkin bo‘lgan nomzodlar ro‘yxatiga kiritildi, deb xabar beradi The Athletic.
Avvalroq “Tottenxem” hujumchisi Xarri Keyn “Manchester Yunayted” uchun ustuvor variant deb hisoblangan, ammo londonliklar 29 yoshli angliyalik futbolchining narxini pasaytirmoqchi emasligi ma’lum qilingandi.
Viktor Osimxen (Napoli), Randal Kolo-Muani (Ayntraxt Frankfurt) va Rasmus Xoylund (Atalanta) kabi "Manchester Yunayted"ning boshqa maqsadlari ham katta sarmoya talab qiladi, shuning uchun klub e’tiborini Uotkinsga qaratdi.
27 yoshli hujumchi o‘tgan mavsumda "Aston Villa" safida barcha turnirlar doirasida 40 ta o‘yinda maydonga tushib, 16 ta gol urdi va 6 ta golli uzatmani amalga oshirdi. Transfermarkt portali uning narxini 32 million yevroga baholamoqda.