"Астон Вилла" ҳужумчиси Олли Уоткинс "Манчестер Юнайтед"нинг ҳужумни кучайтириши мумкин бўлган номзодлар рўйхатига киритилди, деб хабар беради The Athletic.
Аввалроқ “Тоттенхэм” ҳужумчиси Харри Кейн “Манчестер Юнайтед” учун устувор вариант деб ҳисобланган, аммо лондонликлар 29 ёшли англиялик футболчининг нархини пасайтирмоқчи эмаслиги маълум қилинганди.
Виктор Осимхен (Наполи), Рандал Коло-Муани (Айнтрахт Франкфурт) ва Расмус Хойлунд (Аталанта) каби "Манчестер Юнайтед"нинг бошқа мақсадлари ҳам катта сармоя талаб қилади, шунинг учун клуб эътиборини Уоткинсга қаратди.
27 ёшли ҳужумчи ўтган мавсумда "Астон Вилла" сафида барча турнирлар доирасида 40 та ўйинда майдонга тушиб, 16 та гол урди ва 6 та голли узатмани амалга оширди. Transfermarkt портали унинг нархини 32 миллион еврога баҳоламоқда.