«Tottenxem» rahbariyati avvalgi hafta klubning yangi bosh murabbiyi shaxsini rasman e’lon qildi - Ange Postekoglu. Avstraliyalik mutaxassis bunga qadar Yevropada «Seltik» klubini boshqargan edi.
Lekin masalaning nozik tomoni shuki, u Angliya futbolida faqat «Liverpul»ga muxlislik qilgan...
Angliyalik jurnalistlar «Tottenxem» tanlovi e’lon qilingach, Ange Postekoglu tarixini titkilashga tushdilar va uning 2013 yili Channel 10 telekanali (Avstraliya)ga bergan intervyusini topishdi. Murabbiy unda bolaligidan «Liverpul»ga muxlislik qilishini aytgan va hattoki, «qizillar» haqida gapirishda «biz» iborasini ishlatgan.
Tabiiyki, o‘sha intervyudan iqtiboslar ham keltirildi:
«Deyarli butun umrim davomida faqat «Liverpul»ga muxlislik qilganman. To‘g‘ri, 1971 yili Angliya kubogi finalida «Arsenal»ga yutqazganimizni uncha yaxshi eslolmayman, lekin shundan keyin chinakamiga muxlislik qila boshlaganman. Avvaliga Kevin Kigan, keyinroq Kenni Dalglish kabi futbolchilar haqiqiy qahramonlarimga aylanishdi. Albatta, Bill Shenkli tarixini to‘liq o‘qiganman, klubimiz ifodalagan o‘sha madaniyat va ko‘rsatgan o‘yinni juda qadrlayman. Qisqasi, «Liverpul»ni qo‘llab-quvvatlab ulg‘aydim, shuning uchun bugun murabbiyman. Mohiyatan Bill Shenkli, Bob Peysli yonida, murabbiylar shtabi kengashi o‘tgan xonada, Ronni Moran, Jo Fegan, Roy Evans kabi yigitlar «davra»sida ulg‘aydim. O‘sha falsafa hozir ham men bilan. Futbol butun dunyoda modaga aylanmasidan oldin jamoamiz to‘p nazoratiga asoslangan o‘yinni yuqori darajaga olib chiqqandi. Shaxsiy nuqtai nazarim bo‘yicha bu hammani sehrlaydigan tajribadir. Umid qilamanki, avvaliga «Yunayted» ustidan g‘alaba qozonaman va bu orzudagi hafta bo‘ladi».
Dunyoning ishlariga qarang, «Liverpul»ga muhabbat qon-qoniga singib ketgan murabbiy endi sevimli jamoasining asosiy raqiblaridan biri «Tottenxem»da ish boshladi...
