Madridning «Atletiko» klubi hujumchisi Xulian Alvares, ko‘plab mish-mishlarga qaraganda, kelayotgan yozda «Barselona»ga o‘tish niyatida. Markaziy hujumchi pozisiyasini kuchaytirish — «ko‘k-anorranglilar»ning transfer bozoridagi asosiy vazifasi bo‘lib turibdi va 26 yoshli argentinalik futbolchi bu o‘rin uchun eng ma’qul nomzod bo‘lib qolmoqda.
RAC1 ma’lumotlariga ko‘ra, «matraschilar» yulduzining agenti allaqachon mijozining «Barselona»ga o‘tishi bo‘yicha ish boshlagan. Biroq, klublar o‘rtasida kelishuvga erishishdan hali ancha yiroq — madridliklarning talabi haddan tashqari yuqori. Nufuzli Transfermarkt portali ekspertlari Xulian Alvaresning bozor qiymatini 90 million yevroga baholamoqda. Futbolchining «Atletiko» bilan amaldagi shartnomasi 2030 yilgacha mo‘ljallangan.
