David De Xea 2011 yilning yozida xarid qilingan bir nechta futbolchining biri edi. Ser Aleks Fergyuson jamoasi bu paytga qadar kechgan so‘nggi besh mavsumning to‘rttasida chempion bo‘lgan edi. Yangi mavsumga qattiq tayyorgarlik boshlanadi. Negaki, 2011 yilgi YECHL finalida "Barselona"ga imkoniyat boy berilgandi. O‘sha o‘yin, shuningdek, afsonaviy darvozabon Edvin van der Sarning klubdagi so‘nggi bahsi bo‘lgan. Shu sabab yozda "Atletiko"dan yoshgina futbolchi sotib olinadi. O‘sha paytda "qizil iblislar" 21 yoshli De Xea uchun "matraschilar"ga 17 million funt to‘lab beradi. Bu esa bir darvozabon uchun berilgan Angliyadagi eng qimmat summa edi. Hash-pash deguncha, oradan 12 yil o‘tib ketdi. Bu orada De Xea "Manchester Yunayted" safida 500 dan ortiq o‘yin o‘tkazib, rekordchiga aylandi. Shubhasizki, u mankunianliklar tarixida abadiy eslanadigan nomlardan biridir. Xo‘sh, 2011 yilda u bilan jamoaga yana kimlar olib kelingan edi? Ularning taqdiri nima kechdi? Quyida bu savollarga javob olasiz.
Anders Lindegor
Van der Sarning ketishi darvoza sohasini mustahkamlashni talab etadi. Shu maqsadda De Xeadan tashqari yana bir zaxira darvozaboni sotib olinadi. Daniyalik Lindegor "MYU"da o‘z vatandoshi Piter Shmeyxeldek bo‘lishni orzu qiladi. Ammo u yangishgan edi. Tez orada ma’lum bo‘ldiki, u zaxira uchun sotib olingan. Lindegor to‘rt yildan ortiq vaqt davomida jami 19 ta o‘yindagina maydonga tushiriladi. Shulardan 10 tasi 2012-13 yilda, "MYU" so‘nggi bor Angliya chempioni bo‘lgan davrda yuz bergan. 2015 yildan Lindegor erkin agent sifatida "qizil iblislar" safini tark etib, "Vest Brom"ga ko‘chib o‘tadi. U keyinchalik "Byornli" sharafini ham himoya qildi. 2019 yilda o‘z yurtiga qaytgan futbolchi, bir muddat milliy chempionatida to‘p tepdi. 2022 yilda Lindegor futbol bilan xayrlashgan edi.
Fil Jons
Jons yosh himoyachi sifatida ommaning e’tiboriga tushadi. Shu sababli 2011 yil yozida barcha raqiblarini mag‘lub etgan holda "MYU" unga ega chiqadi. Fergyuson davrida Fil Jons asosiy tarkib vakiliga aylangan. Angliya terma jamoasining sobiq a’zosi 2010 yillar avvalida kuchli edi. Ammo jarohatlar uning faoliyatiga bolta urdi. Himoyachi so‘nggi 4 yilda APLda 6 tagina o‘yinda maydonga tushgan edi. U 2023 yilda jamoadan ketdi. Jons "MYU"dagi davri haqida shunday deydi: "Men ko‘proq o‘ynayman deb umid qilgandim. Men menga ko‘proq imkoniyat beriladi deb o‘ylagandim. Qo‘limdan kelgan hamma narsani qildim. "Manchester Yunayted" sharafini himoya qilganimdan faxrlanaman".
Eshli Yang
Yang "Aston Villa"da APLning eng yaxshi vingerlaridan biriga aylanadi. Buni ko‘rgan Fergyuson, uni 2011 yilda 17 million funtga xarid qilgan. APL chempionligi qo‘lga kiritilgan paytda Yang 19 ta o‘yinda maydonga tushirilgan. U Lui Van Gal jamoasida qanot himoyachisiga aylantirilgandi. Ingliz futbolchi ancha vaqt jamoaning barqaror vakili sifatida harakat qildi. 2019 yilda Eron Uan-Bissakaning olib kelinishi, Yangning o‘yin vaqtini kamaytiradi. Bu esa uni "Inter" sari chorlaydi. Yang 2021 yilda Italiya chempioniga aylangan edi. O‘sha yili qahramonimiz APLga qaytib, jonajon klubi bo‘lmish "Aston Villa"da harakat qila boshladi. 2022 yilning yozida Yang birmingemliklar bilan xayrlashdi.
ISMATOV J.