2022-23 yilgi mavsum "Arsenal" muxlislari xotirasida abadiy yashaydi. Mikel Artetaning yosh va yorqin shogirdlari "Manchester Siti"ga kutilmaganda poyga taklif etgan edi. Ha, to‘pchilar oxirida baribir muvaffaqiyatsizlikka yuz tutdi. Ammo hech qachon kech bo‘lmaydi. Yangi mavsumda ham "Arsenal" yanada kuchliroq tarkib bilan kurashga kirishi kutilmoqda. O‘tgan yozgi xaridlar bo‘lgan Jezus va Zinchenkolar jamoaga katta o‘zgartirishlar kiritdi. Ammo bu yetarli emasdi. Arteta yanada ko‘proq nishonlarga ega bo‘lgan. Quyida o‘tgan yoz uchun yana kimlar londonliklar ro‘yxatidan joy olganini bilib olasiz.
Lisandro Martines
"Ayaks" sport direktori Edvin van der Sar shunday degandi: "Lisandro Martines uchun "Arsenal" ancha erta harakat boshlaydi. Biz esa uni saqlab qolishga qaror qilgandik. "MYU" bilan biroz boshqacharoq ish tutdik. Yillar davomida bu jamoa bilan yaxshi hamkorlik aloqalarini yo‘lga qo‘yganmiz. Men "Ayaks" uchun eng yaxshi qarorni qabul qildim".
Shunday qilib, argentinalik "qizil iblislar" safiga yo‘l oldi. U uchun "MYU" 57 million funt to‘lab bergandi. "Arsenal" esa Vilyam Saliba bilan mudofaani mustahkamladi.
Rafinya
"Deko menga Rafinya doimo "Barselona"ga o‘tishni istaganini aytgandi", – deydi "Arsenal" sport direktori Edu. "Lids Yunayted" o‘tgan yozda o‘z vingeri uchun "Arsenal" va "Chelsi"dan kattaroq takliflar olgandi. Ammo yakunda futbolchi xohlagan narsa bo‘ldi: u La-ligaga ketdi. Chempionlik mavsumida Rafinya Xavi jamoasida 7 ta gol va shuncha assist muallifi bo‘ldi. 26 yoshli hujumchi o‘z harakatlari bilan tanqid qilindi.
Yuri Tilemans
Balki "Arsenal" chindan istaganida, Tilemansni sotib olgan bo‘lardi. Negaki, belgiyalik yarim himoyachi "Lester"da atigi 1 yillik shartnomaga ega edi. 26 yoshli futbolchi hozirda erkin agent sifatida "Aston Villa"ga yo‘l oldi. Uning jamoasi o‘tgan mavsumda muvaffaqiyatsizlikka uchrab, APLni tark etgandi.
Kodi Gakpo
2022 yilning yozida Gakpo atrofidagi gap-so‘zlar tinmagandi. Hujumchi yangi mavsumda jamoasini o‘zgartirmadi. Hammasi Qatardagi mundialgacha kechdi. Jahon chempionatidan qaytgach, Gakponi "Liverpul" sotib oldi. Unga "Arsenal", "MYU" va hatto "Lids" ham qiziqish bildirgan edi. Klopp hali hujumchiga o‘zi istagan o‘yin vaqtini taqdim etgani yo‘q. Hammasi to‘liq mavsumda ma’lum bo‘ladi.
Mussa Diabi
Fransiya terma jamoasi a’zosi tez-tez "Arsenal" nazarida ekani aytiladi. Hozir ham ayni shu hol qaytalanmoqda. Bundan bir yil oldin ham shunday edi. Ammo hujumchining o‘zi bu xabarlarni rad etib, shunday degandi: "Men allaqachon qaror qabul qilib bo‘lganman. Keyingi mavsumda ham "Bayer Leverkuzen"da harakat qilaman".
23 yoshli futbolchi gapida turdi va o‘z o‘yinini yangi darajaga olib chiqdi. Hozirda unga da’vogarlar ko‘p. Ular ichida "Arsenal" ham yo‘q emas. Vaziyat esa har daqiqada o‘zgarib ketishi mumkin.
ISMATOV J.