2022-23 йилги мавсум "Арсенал" мухлислари хотирасида абадий яшайди. Микель Артетанинг ёш ва ёрқин шогирдлари "Манчестер Сити"га кутилмаганда пойга таклиф этган эди. Ҳа, тўпчилар охирида барибир муваффақиятсизликка юз тутди. Аммо ҳеч қачон кеч бўлмайди. Янги мавсумда ҳам "Арсенал" янада кучлироқ таркиб билан курашга кириши кутилмоқда. Ўтган ёзги харидлар бўлган Жезус ва Зинченколар жамоага катта ўзгартиришлар киритди. Аммо бу етарли эмасди. Артета янада кўпроқ нишонларга эга бўлган. Қуйида ўтган ёз учун яна кимлар лондонликлар рўйхатидан жой олганини билиб оласиз.
Лисандро Мартинес
"Аякс" спорт директори Эдвин ван дер Сар шундай деганди: "Лисандро Мартинес учун "Арсенал" анча эрта ҳаракат бошлайди. Биз эса уни сақлаб қолишга қарор қилгандик. "МЮ" билан бироз бошқачароқ иш тутдик. Йиллар давомида бу жамоа билан яхши ҳамкорлик алоқаларини йўлга қўйганмиз. Мен "Аякс" учун энг яхши қарорни қабул қилдим".
Шундай қилиб, аргентиналик "қизил иблислар" сафига йўл олди. У учун "МЮ" 57 миллион фунт тўлаб берганди. "Арсенал" эса Вильям Салиба билан мудофаани мустаҳкамлади.
Рафинья
"Деко менга Рафинья доимо "Барселона"га ўтишни истаганини айтганди", – дейди "Арсенал" спорт директори Эду. "Лидс Юнайтед" ўтган ёзда ўз вингери учун "Арсенал" ва "Челси"дан каттароқ таклифлар олганди. Аммо якунда футболчи хоҳлаган нарса бўлди: у Ла-лигага кетди. Чемпионлик мавсумида Рафинья Хави жамоасида 7 та гол ва шунча ассист муаллифи бўлди. 26 ёшли ҳужумчи ўз ҳаракатлари билан танқид қилинди.
Юри Тилеманс
Балки "Арсенал" чиндан истаганида, Тилемансни сотиб олган бўларди. Негаки, бельгиялик ярим ҳимоячи "Лестер"да атиги 1 йиллик шартномага эга эди. 26 ёшли футболчи ҳозирда эркин агент сифатида "Астон Вилла"га йўл олди. Унинг жамоаси ўтган мавсумда муваффақиятсизликка учраб, АПЛни тарк этганди.
Коди Гакпо
2022 йилнинг ёзида Гакпо атрофидаги гап-сўзлар тинмаганди. Ҳужумчи янги мавсумда жамоасини ўзгартирмади. Ҳаммаси Қатардаги мундиалгача кечди. Жаҳон чемпионатидан қайтгач, Гакпони "Ливерпуль" сотиб олди. Унга "Арсенал", "МЮ" ва ҳатто "Лидс" ҳам қизиқиш билдирган эди. Клопп ҳали ҳужумчига ўзи истаган ўйин вақтини тақдим этгани йўқ. Ҳаммаси тўлиқ мавсумда маълум бўлади.
Мусса Диаби
Франция терма жамоаси аъзоси тез-тез "Арсенал" назарида экани айтилади. Ҳозир ҳам айни шу ҳол қайталанмоқда. Бундан бир йил олдин ҳам шундай эди. Аммо ҳужумчининг ўзи бу хабарларни рад этиб, шундай деганди: "Мен аллақачон қарор қабул қилиб бўлганман. Кейинги мавсумда ҳам "Байер Леверкузен"да ҳаракат қиламан".
23 ёшли футболчи гапида турди ва ўз ўйинини янги даражага олиб чиқди. Ҳозирда унга даъвогарлар кўп. Улар ичида "Арсенал" ҳам йўқ эмас. Вазият эса ҳар дақиқада ўзгариб кетиши мумкин.
ИСМАТОВ Ж.
