OKMK jamoasi bir qator o‘yinchilarini o‘yin amaliyotiga ko‘proq ega bo‘lishi maqsadida turli jamoalarga ijaraga berishga qaror qildi. Bu haqda klub matbuot xizmati xabar berdi.

O‘ng qanot himoyachisi, O‘zbekiston olimpiya terma jamoamizga nomzod Eldorbek Begimov «Olimpik» jamoasiga borib qo‘shilgan bo‘lsa, iqtidorli hujumchi Boburbek Sobirov «Qo‘qon-1912» jamoasiga o‘tdi.

Mavsum boshida jamoaga Gruziyaning «Samgurali» klubidan kelib qo‘shilgan Irakli Ruxadze esa mavsum yakuniga qadar Gruziyaning boshqa bir jamoasi «Telavi» jamoasiga ijaraga berildi.

Shuningdek, ko‘p yillar mobaynida olmaliqliklar sharafini himoya qilgan Murodjon Toshmatov va Mirg‘iyos Sulaymonov bilan o‘rtadagi bitim o‘zaro kelishuvga ko‘ra bekor qilinib, do‘stona xayrlashildi.