"Ravshan" hamda "Andijon" (1:1) jamoalari o‘rtasidagi o‘rtoqlik o‘yinidan keyin "Ravshan" jamoasi bosh murabbiyi Tohir Mo‘minov "Andijon" matbuot xizmatiga o‘z fikrlari bilan o‘rtoqlashdi.

- Dastlab, o‘yin xususidagi fikrlaringiz bilan o‘rtoqlashsangiz.

- Albatta, uchrashuv to‘g‘risida yaxshi fikrdaman. Ikkita o‘yin o‘tkazdik va yaxshi taassurotlar qoldi. Birinchi “Buxoro”, keyin esa mana “Andijon” bilan o‘rtoqlik uchrashuvini o‘tkazdik. Bunday bahslar bizga OFK Kubogiga yaxshigina tayyorgarlik vazifasini bajardi, deb o‘ylayman. Agar yana imkoniyat bo‘lsa, shunday jamoalar bilan o‘rtoqlik o‘yinlari o‘tkazishni xohlardim. Mana shunday uchrashuvlar orqali futbolchilarimizning tayyorgarlik jarayonlari shakllanib boradi. Bugungi uchrashuv hujumkor va do‘stona ruxda kechdi va menga har tomonlama yoqdi.

- Demak, o‘yindan qoniqdingiz-a?

- Albatta, qoniqdim. Avvalgi uchrashuvimizga qaraganda, bu o‘yinda ozgina farqli tomonlari sezildi. “Andijon”ga qarshi jamoamni yaxshi tayyorlagandim.

- Sobiq jamoangiz haqida nima deya olasiz?

- Albatta, o‘zbek va tojik futboli rivojlanib boryapti. Men “Andijon” jamoasiga ikkinchi davrada omad tilayman. Tabiiyki, bu klubga muxlislik qilaman. Turnir jadvalida yuqori o‘rinlarda bo‘lishini xohlayman. Asosiy tarkib saqlanib qolinib, tayyorgarlik jarayonlari yaxshi o‘tsa, o‘ylaymanki, “Andijon” kuchli klublar qatoriga kiradi. Bu borada ularga omad tilayman.