Joriy yozgi transfer oynasida gabonlik hujumchi Pyer-Emerik Obameyang Londonning “Chelsi” klubini tark etdi va erkin agent sifatida Fransiyaning "Marsel" jamoasiga o‘tdi.

"Provansliklar" 34 yoshli futbolchini qo‘lga kiritish uchun futbolchining otasi bilan to‘g‘ridan-to‘g‘ri transfer bo‘yicha muzokaralar olib bordi. Futbolchining otasi muzokaralar tafsilotlari haqida gapirdi.

"6 iyul kuni men kasalxonaga operasiya qilish uchun qaytishim kerak bo‘lganida, vaziyat juda murakkablashdi. Pyer bu yomon xabarni qattiq qabul qildi.

Biroq, operasiyadan keyin kasalxonada, "Marsel" prezidenti Pablo Longoriya shaxsan tashrif buyurdi va "Marsel"ni rivojlantirish loyihasini taqdim etdi.

Keyin u haqiqatan ham hamma narsani ochiq-oydin aytdi, shuning uchun men o‘g‘limning yaxshi klubda bo‘lishiga shubha qilmadim.

Qolaversa, bosh murabbiy Marselinyo ham shaxsan unga qiziqayotganini bilardim.

Keyin bu suhbat bo‘yicha o‘z xulosalarimni Pyerga ma’lum qilishgina qoldi. Men unga video havola orqali qo‘ng‘iroq qildim va darhol: "Allez l'OM!!" (Olg‘a, "Marsel!" muallif) - dedim

Keyin u shunchaki kulib yubordi va men unga aytdim: "Ha? Demak, baxtlisan yoki yo‘qmi?"

Va u menga javob berdi: "Qanday qildingiz? Ayting-chi! Hazillashmayapsizmi? Bu qandaydir aqlbovar qilmas narsa!" - dedi.

Keyin "Chelsi"dan ba’zi tafsilotlarni kelishib olishimiz kerak edi. Ammo o‘g‘lim “Marsel” stadionidagi muhitni shunchalik yaxshi ko‘radiki, u menga: “Bu yerda mening birinchi golimni tasavvur qila olasizmi?”, dedi.

O‘shanda unga birinchi o‘yinda uni qo‘llab-quvvatlash uchun stadionga kelishga va’da berdim”, — dedi gabonlik futbolchining otasi.