Rossiya. RPL 7-turida 2 nafardan hamyurtimizni o‘z safiga olgan «Pari NN» va «Rubin» klublari o‘zaro to‘qnash keldi. Biroq legionerlarimizning yo‘llari maydonda kesishgani yo‘q. Chunonchi, «Pari NN» himoyachisi Ibrohimxalil Yo‘ldoshev 82-daqiqadagina zaxiradan tushdi, o‘yinni «Rubin»ning boshlang‘ich tarkibida boshlagan Umarali Rahmonaliyev esa 78-daqiqagacha harakatlandi. Qolgan ikki vakilimiz - Ruslan Jiyanov («Pari NN») va Rustam Ashurmatov («Rubin») o‘yindan chetda qolishdi. Natijaga kelsak, Nijniy Novgorod jamoasi 2:1 hisobida ustun keldi.
O‘z o‘rnida aytish kerak, Rustam Ashurmatov hafta o‘rtasida o‘tkazilgan Rossiya kubogi guruh bosqichi doirasidagi «Rubin» - «Ural» o‘yini (2:1)da o‘z hisobiga gol yozdirib qo‘ygandi. Yakunda u Qozon klubining «Telegram» kanalida o‘tkazilgan so‘rov natijasiga muvofiq, uchrashuvning eng yaxshi futbolchisi sifatida tan olindi. RPL 7-turining markaziy o‘yini sifatida e’tirof etilgan SSKA - «Zenit» to‘qnashuvida esa kuchlar teng keldi - 1:1. «Armiyachilar» yarim himoyachisi Abbos Fayzullayev bu uchrashuvda maydonga tushirilmadi. Vaholanki, yosh legionerimiz Rossiya kubogidan o‘rin olgan «Sochi»ga qarshi bahs (0:0, penaltilar seriyasi bo‘yicha 5:4 - SSKA g‘alabasi)da ilk marta «harbiylar»ning boshlang‘ich tarkibidan o‘rin olgan va 70-daqiqagacha to‘p surib, chakki taassurot uyg‘otmagandi.
Fransiya. O‘tgan mavsum Liga 1da 2-o‘rinni egallagan «Lans»ning ishlari aslo yurishmayapti. Abduqodir Husanovning jamoasi Fransiya chempionati 4-turida «Monako» mehmoni bo‘lib, yirik - 0:3 hisobida yengildi. Jamoa bosh murabbiyi Frank Ez bu safar ham legionerimizni jangga tashlagani yo‘q. Lansliklar 4ta o‘yindan so‘ng atigi 1 ochko bilan turnir jadvali 17-pog‘onasida borishmoqda.
Italiya. «Kalyari» va Eldor Shomurodovning ishlari ham yaxshi emas. Klaudio Ranyeri shogirdlari «A» seriya 3-tur o‘yinini safarda «Bolonya»ga qarshi o‘tkazib, 1:2 hisobida imkoniyatni boy berishdi. Milliy jamoamiz sardori o‘yinga ikkinchi bo‘lim boshida qo‘shildi, ammo biror samarali harakati bilan ko‘zga tashlanmadi. «Kalyari» 3-turdan so‘ng 1 ochkoga ega va turnir jadvalida 19-o‘rinni band etib turibdi.
Turkiya. Superliga 4-turidan o‘rin olgan «Rizespor» - «Fotih Qoragyumryuk» o‘yini taqdirini mezbon jamoaning yagona goli hal qildi. E’tiborlisi, bu uchrashuvda ikki legionerimiz maydonda qisqa vaqt o‘zaro raqib bo‘ldi. Ya’ni «Fotih» yarim himoyachisi Otabek Shukurov 69-daqiqada safga qo‘shilgan bo‘lsa, «Rizespor» himoyachisi Husniddin Aliqulov 89-daqiqada maydonga tushdi. Aytish joiz, Husniddin jarohat tufayli orada jamoasining 2ta o‘yinini o‘tkazib yuborgandi. Shukurovning so‘nggi lahzada sariq kartochka olganini ham qayd etish joiz. «Rizespor» xalqaro tanaffusga Superliga turnir jadvali 6-pog‘onasida chiqqan bo‘lsa (klub 4ta o‘yinda 7 ochko oldi), «Fotih Qora-gyumryuk» 4 ochko bilan 13-pog‘onada.
