Kataloniyaning “Barselona” klubi bosh murabbiyi Xavi Ernandes “ko‘k-anorranglilar” rahbariyati bilan yangi shartnomani imzolash borasida kelishib oldi. Bu haqda insayder Fabrisio Romano ijtimoiy tarmoqlar orqali xabar berdi.
Jurnalistning xabar berishicha, 43 yoshli mutaxassis va "Barselona" o‘rtasidagi yangi shartnoma shu hafta oxirigacha e’lon qilinadi. Ernandesning klub bilan amaldagi shartnomasi kelasi yilning o‘rtalariga qadar mo‘ljallangan.
O‘tgan mavsumda Xavi boshchiligidagi "Barselona" Ispaniya chempioniga aylangandi. Joriy La Ligada jamoa to‘rt turdan keyin uchinchi o‘rinda bormoqda.
