Raqibimiz Meksika terma jamoasi 4-3-3 sxemasi bo‘yicha harakat qiladi. Jamoa o‘yini "Vest Xem" futbolchisi Edson Alvares atrofida qurilgan. Aslida tayanch yarim himoyachisi bo‘lgan futbolchi hujumni yaxshi boshlashi uchun Meksika terma jamoasida markaziy himoyachi rolida o‘ynaydi.

Jamoa, asosan, o‘ng qanotdan ko‘proq hujum qiladi. Chunki bu qanotda huquqiy jihatdan "Barselona"ga tegishli o‘ng qanot himoyachisi, tezkor Xulian Arauxo va jamoaning eng xavfli vingeri Uriel Antuna harakat qilishadi.

Shuningdek,  veteran-darvozabon Gilyermo Ochoa, jamoa to‘purari Raul Ximenes, kreativ pleymeyker Karlos Vega va "Atletiko"ning sobiq yarim himoyachisi, tajribali Ektor Errerani alohida ta’kidlab o‘tish lozim.

Demak, jamoaning kuchli tomonlari:

- Yakkakurashlarda agressiv. Meksikalik futbolchilar maydonning har bir qarichi uchun kurashda o‘ziniyam, raqibiniyam ayab o‘tirishmaydi. Bu jihati bilan shu paytgacha o‘ynagan jamoalarimiz orasida Venesuelani eslatib yuborishadi;

- Texnik jihatdan kuchli. AQSH safida Vea yoki Dest kabi alohida futbolchilar texnikasi bilan ajralib turgan bo‘lsa, Meksikaning barcha futbolchilari yuqori texnikaga ega;

- Muxlislar. Meksika terma jamoasi AQSH maydonlarida har doim o‘z uyida o‘ynagandek o‘ynaydi. AQSHga qarshi o‘yindan farqli o‘laroq, "Mersedes-Bens" stadioniga 70 ming atrofida meksikaliklar kelishi kutilmoqda.

Kuchsiz tomonlari:

- Atletizm. Meksikalik futbolchilar AQSH futbolchilariga qaraganda maydaroq, bo‘yi baland futbolchilari ham sanoqli. Bu bizga standart vaziyatlarda qo‘l kelishi mumkin;

- Tartibsiz pressing. Meksikaliklar yuqori, lekin individual va tartibsiz pressing qilishadi. To‘p bilan yaxshi harakatlanadigan futbolchilarimiz jamoaviy pressing yo‘qligidan unumli foydalanib, himoyadan qisqa paslar orkali chiqib ketishlari mumkin.