"Brentford" bosh murabbiyi Tomas Frank futbolga garov tikish qoidalarini buzganligi sabab yanvargacha o‘yinlarda ishtirok etmaydigan hujumchi Ayvan Tounining darajasini yuqori baholadi.
“Touni - dunyoning eng yaxshi hujumchilaridan biri. Ayni damda Ayvandan yaxshiroq bo‘lgan ko‘plab o‘yinchilarni keltira olmayman. Keyn, Levandovski va Xolanddan tashqari. Top-klubda Touni bir mavsumda 20-25 gol urardi. Nima uchun klublar unga e’tibor qaratayotganini tushunaman", - dedi Frank matbuot anjumanida.
Oldinroq Londonning “Chelsi” klubi Toni xizmatlariga qiziqish bildirayotgani va yanvar oyida transferni amalga oshirishga harakat qilishi haqida xabar berilgandi. Eslatib o‘tamiz, Ayvan o‘tgan mavsumda Premyer-ligada 20 ta gol urdi.
