«Arsenal» yarim himoyachisi Martin Edegor «PSV»ga qarshi uchrashuvning eng yaxshi futbolchisi deb topildi.

«Kanonirlar» Chempionlar ligasini Gollandiya klubi ustidan ishonchli g‘alaba (4:0) bilan boshladi.

24 yoshli norvegiyalik futbolchi 70-daqiqada gol urib, tablodagi yakuniy natijani qayd etdi, uchrashuv boshida Bukayo Sakaga golli pas ham berdi.

O‘z sa’y-harakatlari uchun Edegor UYEFA tomonidan o‘yinning eng yaxshi futbolchisi sovrinini oldi. Londonliklar sardori nafaqat ikkita golda ishtirok etdi, balki darvoza tomon eng ko‘p zarba berdi (Gabriel Jezus bilan birga - har biri uch marta), shuningdek, muvaffaqiyatli driblinglar (uchta) va aniq paslar (64) bo‘yicha jamoa yetakchisiga aylandi.