Bellinhem — elegant futbolchi. Bu uning shu bilan birga kamchiligi ham. O‘z vaqtida Pol Pogba aynan shu darajadagi futbolchi bo‘lgan.

Farq, Bellinhemning yo uning atrofidagilarning juda aqlli ekani va futbolchi uchun eng to‘g‘ri tanlovni amalga oshirganida.

U «Liverpul»ni tanlashi ham mumkin edi va balkim Pogbaning yo‘lidan ketardi. Ya’ni Judni Polga o‘xshatganlar uning himoyalanishda biroz dangasa ekanini, to‘psiz harakatlanishda intizomsizroq ekanini aytishadi. Aynan shu jihatlar Liverpulda ochiqroq namoyon bo‘lardi, ishonavering. Chunki u yerga xuddi bir paytlar Pol «MYU»ga borgandek hammasini o‘zgartirishi lozim bo‘lgan, yangi qurilayotgan jamoaga asosiy yulduz sifatida borardi. Eplarmidi, bilmadim.

«Real» esa, Bellinhem uchun ayni muddao. U hozir ham asosiy yulduz, ammo shu bilan birga, ikki kishi uchun yuguradigan Valverde deysizmi, Tchuamenimi, Kamavingami, bor. Hatto Benzema ham gollar uchun joy ochib ketdi. Bellinhemning barcha ustunliklari namoyon bo‘ladigan, hamda barcha kamchiliklari ko‘proq yashiriladigan jamoa.

Kel va qahramon bo‘l, bunaqa sharoit qayerda bor yana?

«Real» yozning eng zo‘r transferini amalga oshirdi, o‘zi uchun eng zo‘r futbolchini topdi, deyishmoqda.

Yo‘q.

Bellinhem o‘zi uchun eng zo‘r klubni topdi. Eng zo‘r transferni u amalga oshirdi.

Qahramon Aslanov.