Беллинҳэм — элегант футболчи. Бу унинг шу билан бирга камчилиги ҳам. Ўз вақтида Пол Погба айнан шу даражадаги футболчи бўлган.

Фарқ, Беллинҳэмнинг ё унинг атрофидагиларнинг жуда ақлли экани ва футболчи учун энг тўғри танловни амалга оширганида.

У «Ливерпуль»ни танлаши ҳам мумкин эди ва балким Погбанинг йўлидан кетарди. Яъни Жудни Полга ўхшатганлар унинг ҳимояланишда бироз дангаса эканини, тўпсиз ҳаракатланишда интизомсизроқ эканини айтишади. Айнан шу жиҳатлар Ливерпулда очиқроқ намоён бўларди, ишонаверинг. Чунки у ерга худди бир пайтлар Пол «МЮ»га боргандек ҳаммасини ўзгартириши лозим бўлган, янги қурилаётган жамоага асосий юлдуз сифатида борарди. Эплармиди, билмадим.

«Реал» эса, Беллинҳэм учун айни муддао. У ҳозир ҳам асосий юлдуз, аммо шу билан бирга, икки киши учун югурадиган Валверде дейсизми, Тчуаменими, Камавингами, бор. Ҳатто Бензема ҳам голлар учун жой очиб кетди. Беллинҳэмнинг барча устунликлари намоён бўладиган, ҳамда барча камчиликлари кўпроқ яшириладиган жамоа.

Кел ва қаҳрамон бўл, бунақа шароит қаерда бор яна?

«Реал» ёзнинг энг зўр трансферини амалга оширди, ўзи учун энг зўр футболчини топди, дейишмоқда.

Йўқ.

Беллинҳэм ўзи учун энг зўр клубни топди. Энг зўр трансферни у амалга оширди.

Қаҳрамон Асланов.