"Arsenal"ning 2021 yildagi Edegorni sotib olish qarori to‘g‘ri bo‘lgani o‘z tasdig‘ini topmoqda. 24 yoshli futbolchi "Real"dan 30 million funt evaziga sotib olingandi. U allaqachon jamoa sardoriga aylandi. Norvegiya terma jamoasi a’zosi 2021 yilda "Arsenal" tomonidan nishonga olingan yagona futbolchi emasdi. Quyida boshqa variantlar kim bo‘lganiga e’tibor qaratamiz.
Isko
Bir paytlar Isko Yevropaning eng yaxshi futbolchilaridan biri edi. Ispaniyalik yarim himoyachi 2014-2018 yillarda qo‘lga kiritilgan YECHL sovrinlarini yutishda katta bajargandi. Ammo vaqt o‘tgani sari Iskoning jamoadagi o‘rni yo‘qolib bordi. 2021 yilda Edegordan tashqari, Isko varianti ham "Arsenal" tomonidan ko‘rib chiqiladi. Hozir aytish mumkinki, London klubi "Real"ning yoshroq yulduzini tanlab to‘g‘ri qilgan.
Ussem Auar
2020 yilning yozida "Arsenal" yosh jazoirlik futbolchi iziga tushadi. Jamoa muxlislari "Lion" yulduzini sotib olish haqida juda ko‘p gapirishgandi. Ammo ko‘pgina sabablar ortidan buning iloji bo‘lmaydi. Auar 2019/20 yilgi mavsumda "Manchester Siti"ni YECHLning chorak finalida taslim qilishda katta ish bajaradi. Hatto, 2021 yilning qishida va yozida "Arsenal" Auarga taklif bergan. Ammo bu ish amalga oshmadi. Ayni damda Auar "Roma" safida harakat qilmoqda.
Bernardu Silva
Garchand so‘nggi yillarda Bernardu Silva nomi Gvardiola jamoasi uchun o‘ta muhim bo‘lib kelayotgan bo‘lsada, portugaliyalik atrofida transfer mish-mishlari doimo yuradi. Unga "Barselona" uzoq yillardan beri qiziqadi. 2021 yilda esa Bernarduga da’vogarlar orasida "Arsenal" ham bor edi. Jek Grilish sotib olinganidan keyin, Silva Gvardioladan ketishni so‘ragan. Ammo "Manchester Siti" rahbariyati uni olib qolishga muvaffaq bo‘ladi.
Jeyms Meddison
Meddison "MYU" uchun Brunu Fernandeshdan oldingi, "Arsenal" uchun esa Edegordan oldingi ehtimoliy nishon edi. Ammo "Lester Siti"ning o‘z futbolchisi uchun qo‘ygan narxi o‘ta baland bo‘lgan. Shu sababli Edegor varianti tanlangani aytiladi. Ammo bu to‘g‘ri bo‘lib chiqdi. Meddison bu yozda "Tottenxem"ga o‘tgandi. Endi esa ular ertaga to‘qnash kelishadi.
ISMATOV J.
