"Арсенал"нинг 2021 йилдаги Эдегорни сотиб олиш қарори тўғри бўлгани ўз тасдиғини топмоқда. 24 ёшли футболчи "Реал"дан 30 миллион фунт эвазига сотиб олинганди. У аллақачон жамоа сардорига айланди. Норвегия терма жамоаси аъзоси 2021 йилда "Арсенал" томонидан нишонга олинган ягона футболчи эмасди. Қуйида бошқа вариантлар ким бўлганига эътибор қаратамиз.
Иско
Бир пайтлар Иско Европанинг энг яхши футболчиларидан бири эди. Испаниялик ярим ҳимоячи 2014-2018 йилларда қўлга киритилган ЕЧЛ совринларини ютишда катта бажарганди. Аммо вақт ўтгани сари Исконинг жамоадаги ўрни йўқолиб борди. 2021 йилда Эдегордан ташқари, Иско варианти ҳам "Арсенал" томонидан кўриб чиқилади. Ҳозир айтиш мумкинки, Лондон клуби "Реал"нинг ёшроқ юлдузини танлаб тўғри қилган.
Уссем Ауар
2020 йилнинг ёзида "Арсенал" ёш жазоирлик футболчи изига тушади. Жамоа мухлислари "Лион" юлдузини сотиб олиш ҳақида жуда кўп гапиришганди. Аммо кўпгина сабаблар ортидан бунинг иложи бўлмайди. Ауар 2019/20 йилги мавсумда "Манчестер Сити"ни ЕЧЛнинг чорак финалида таслим қилишда катта иш бажаради. Ҳатто, 2021 йилнинг қишида ва ёзида "Арсенал" Ауарга таклиф берган. Аммо бу иш амалга ошмади. Айни дамда Ауар "Рома" сафида ҳаракат қилмоқда.
Бернарду Силва
Гарчанд сўнгги йилларда Бернарду Силва номи Гвардиола жамоаси учун ўта муҳим бўлиб келаётган бўлсада, португалиялик атрофида трансфер миш-мишлари доимо юради. Унга "Барселона" узоқ йиллардан бери қизиқади. 2021 йилда эса Бернардуга даъвогарлар орасида "Арсенал" ҳам бор эди. Жек Грилиш сотиб олинганидан кейин, Силва Гвардиоладан кетишни сўраган. Аммо "Манчестер Сити" раҳбарияти уни олиб қолишга муваффақ бўлади.
Жеймс Меддисон
Меддисон "МЮ" учун Бруну Фернандешдан олдинги, "Арсенал" учун эса Эдегордан олдинги эҳтимолий нишон эди. Аммо "Лестер Сити"нинг ўз футболчиси учун қўйган нархи ўта баланд бўлган. Шу сабабли Эдегор варианти танлангани айтилади. Аммо бу тўғри бўлиб чиқди. Меддисон бу ёзда "Тоттенхэм"га ўтганди. Энди эса улар эртага тўқнаш келишади.
ИСМАТОВ Ж.
