Superliganing 19-turidan o‘rin olgan “Nasaf” – “Bunyodkor” (0:1) uchrashuvidan keyin mehmonlar ustozi Aleksandr Krestinin o‘z fikrlari bilan o‘rtoqlashdi.

-  “Bunyodkor”ning sodiq muxlislarini va albatta futbolchilarni bugungi g‘alaba bilan tabriklayman! Oddiy o‘yin bo‘lgani yo‘q. Yigitlarga rahmat, maksimum darajada harakat qilishdi. Hammasi ajoyib, safarda g‘alaba qozondik. “Nasaf” juda tajribali va yuqori saviyadagi jamoa. Qolaversa, raqib Osiyo Chempionlar ligasida ishtirok etyapti.

Biz XXI asrda yashayapmiz. Raqibni yetarli darajada o‘rganishimiz uchun ma’lumotlar keragidan ortiq edi. O‘yinga esa odatiy tarzda tayyorgarlik ko‘rgandik. Tarkibda amalga oshirgan o‘zgarishlarimiz tabiiy ravishda amalga oshdi. Bugungi kunda kim maydonga tushishga tayyor bo‘lsa, ular uchrashuvni boshlang‘ich tarkibda boshladi. Qolganlar zaxiradan tushib, jamoaga yordam berdi.

“Bunyodkor”da ish boshlagunimga qadar Superliga va o‘zbek futboli haqida ma’lumotga ega edim. Superliga kuchli va qiyin chempionat. Ligada kuchsiz jamoaning o‘zi yo‘q.