"Manchester Yunayted" bosh murabbiyi Erik ten Xag yana Jeydon Sancho haqidagi savolga to‘g‘ridan-to‘g‘ri javob berishdan qochdi.
Angliyalik futbolchi asosiy jamoa mashg‘ulotlari va o‘yinlaridan chetlashtirildi. Eslatib o‘tamiz, niderlandiyalik murabbiy 23 yoshli vingerni mashg‘ulotlarda yetarlicha tirishqoqlik qilmayotganlikda ayblagan, bunga u ijtimoiy tarmoqlarda tanqidiy post bilan javob bergan va shundan so‘ng u chetlatilgan edi.
"Qizil iblislar" "Kristal Pelas"ni mag‘lub etgan (3:0) Liga kubogi o‘yinida jurnalistlar yana bir bor ten Xagdan Sancho bilan bog‘liq vaziyat haqida so‘rashdi: "Men mavjud bo‘lmagan futbolchilar haqida gapirmayapman. Hammasi unga bog‘liq", - deb javob berdi mutaxassis Sky Sports nashriga bergan intervyusida.
