Xanchjou-2022 Osiyo O‘yinlarida taekvonda bo‘yicha bugun ayollar va erkaklar eng og‘ir vazn toifalarida musobaqalarda ishtirok etishmoqda.

Erkaklar o‘rtasida 80+ kg. vaznda tajribali hamyurtimiz Nikita Rafalovich o‘z ishtirokini chorak finaldan boshladi. Ammo u mazkur bosqichda, kutilmaganda, imkoniyatni boy berib qo‘ydi.

Nikitaga taypeylik Li Meng En raqiblik qildi. Birinchi raundda hamyurtimiz 3:1 hisobida oldinda borayotgandi, ammo bo‘lim tugashiga 18 soniya qolganida raqib boshga zarba berib, 3 ochko ishlashga muvaffaq bo‘ldi va raundlar bo‘yicha oldinga o‘tib oldi.

Rafalovich ikkinchi bo‘limda katta ustunlikka erishib, 8:0 hisobida muvozanatni tikladi. Uchinchi bo‘limda esa Li 3:2 hisobida g‘alaba qozonib, yarim final yo‘llanmasini qo‘lga kiritdi. Rafalovich esa ushbu bosqichda o‘z yurishini to‘xtatdi, vaholanki, u ushbu vaznning 1-raqamli sportchisi edi.