Xitoydagi Osiyo O‘yinlarida futbol bo‘yicha O‘zbekiston  olimpiya terma jamoasi nimchorak final bosqichi uchrashuvini o‘tkazdi. Temur Kapadze jamoasi Indoneziya ustidan qiyinchilik bilan g‘alaba qozondi.

Indoneziyaliklar birinchi bo‘limda jiddiy qarshilik ko‘rsatgan bo‘lishsa, ular ikkinchi bo‘limda to‘laligicha himoyaga "yotishdi". Shunga qaramay, jamoamiz ikkinchi bo‘limda gol urish uchun bir nechta imkoniyatlarga ega bo‘ldi. Ammo yo zarbaga biroz aniqlik yetishmadi, yoki zarbalar yo‘liga himoyachilar g‘ov bo‘lishdi.

Asosiy vaqtda hisob ochilmagach, hakam jamoalarni qo‘shimcha bo‘limlarga taklif etdi. Aynan qo‘shimcha bo‘lim boshida zaxiradan maydonga tushirilgan Sherzod Esanov jamoamizni keyingi bosqichga olib chiqdi. Ekstra-taymlar boshida qanotdan yekazilgan uzatmani "Metallurg" futbolchisi darvozaga joylab qo‘ydi. Qo‘shimcha bo‘limlarning ikkinchisi yakunlanayotgan paytda esa Esanovning o‘zi ikkinchi to‘p raqib darvozasini ishg‘ol qildi.

Mazkur ikki golimiz orasida Indoneziya "standart"dan hisobni tenglashtirgandi, ammo gol urgan o‘yinchi ofsaydda deb topildi va gol bekor qilindi. Bundan tashqari, indoneziyalik futbolchi Samir Xugo ikkinchi sariq kartochkani olib maydonni tark etgani ham bizga yordam berdi.

Shu tariqa, ko‘p kuch sarflangan bahsda O‘zbekiston U23 terma jamoasi chorak finalga chiqdi. Jamoamiz bu bosqichda Saudiya Arabistoni - Hindiston juftligi g‘olibiga qarshi maydonga tushadi. Bu bahs 1 oktyabr kuni bo‘lib o‘tadi.

Xanchjou-2022. Futbol. 1/8 final
O‘ZBEKISTON - INDONEZIYA - 2:0 (0:0, 0:0, 1:0, 1:0)
Gollar: Sherzod Esanov (92, 120+1)
Chetlatish: Samir Xugo (112)