Xanchjou Osiyo o‘yinlarida baydarka va kanoe yo‘nalishida saralash bahslari bo‘lib o‘tmoqda.

Yekaterina Shubina hamda Arina Tanatmisheva juftligi baydarkachi qizlar o‘rtasida 500 metrga kechgan saralash bahslarida munosib ishtirok etdi. Xitoylik juftlik bilan keskin raqobat olib borgan hamyurtlarimiz kichik farq bilan mezbonlarga imkoniyatni boy berib, ikkinchi o‘rinda marra chizig‘ini kesib o‘tishdi. Bu natija final uchun yetarli bo‘ldi.

O‘zbekiston terma jamoasi a’zolari Artur Guliyev hamda Kamron Ahtamovdan iborat kanoeda eshkak eshish bo‘yicha juftlik 500 metrga kechgan saralash dasturida muvaffaqiyatli qatnashdi. Hamyurtlarimiz  1:48.098 daqiqada o‘z guruhlarida birinchi bo‘lib finishga kelishdi va final masalasini ijobiy hal qilishdi.

Ayollar dasturidan so‘ng bardarkachi yigitlarimiz ham 500 metrga eshkak eshish dasturida final yo‘llanmasiga ega bo‘lishdi. Denis Onufriyev hamda Ozodjon Amriddinov juftligi saralashda 1:38.285 daqiqada uchinchi bo‘lib marraga yetib keldi va finalchilar qatoridan joy oldi.