Osiyo chempionlar ligasi guruh bosqichini safardagi g‘alaba bilan boshlagan "Nasaf" bugun o‘z maydonida Qatarning nomdor jamoalaridan biri "As-Sadd"ni qabul qildi. Ro‘ziqul Berdiyev shogirdlari mazkur o‘yinda yuqori pressingga asoslangan hujumkor o‘yin namoyish etib berishdi.

Bu uslub esa o‘z samarasini berdi. Bahsning 29-daqiqasida qanotdan uzatma berilgan to‘p himoyachining bosh orqali jarima maydoni ichida turgan Nurulloyevga kelib tushdi. Suhrob to‘pni to‘xtatdi va 12 metrlardan aniq zarba bilan hisobni ochdi.

Ikkinchi bo‘limning dastlabki daqiqasi qarshiliklar uchun omadli keldi. Siddiqovning chiroyli uzamasidan keyin Omonov qulay vaziyatga chiqib bordi va yo‘l-yo‘lakay bir himoyachini aldab o‘tib, olis burchak tomon zarba berdi. To‘p esa ustunga tegib, chiziqni kesib o‘tdi — 2:0.

Oradan ko‘p o‘tmasdan Azizbek Omonov o‘zining ikkinchi, jamoasining uchinchi to‘pini kiritdi. Bozorovning aniq pasidan keyin hujumchi yana darvozabon bilan yakkama-yakka vaziyatga chiqib ketdi hamda "parashyut" uslubida darvozani ishg‘ol qildi — 3:0.

Qatarliklar o‘yin so‘ngida bitta javob to‘pini kiritishdi. Gol muallifi — Bualim Xuxiy.

"Nasaf" ushbu g‘alaba tufayli o‘z ochkolarini 6 taga yetkazib oldi. BAAning "Sharja" klubi bugun o‘z maydonida "Al-Faysaliy"ni qabul qilib, 1:0 hisobida g‘alaba qozondi va ochkolarini 4 taga yetkazdi. "Sharja" 23 oktyabr kuni o‘z maydonida "Nasaf"ni qabul qiladi.

OCHL. "B" guruhi, 2-tur
"NASAF" - "AS-SADD" - 3:1 (1:0)
Gollar: Suhrob Nurullayev (29), Azizbek Omonov (47, 58) — Bualim Xuxiy (84)
Ogohlantirishlar: Suhrob Nurulloyev (42), G‘olib G‘aybullayev (50), Javohir Sidiqov (60), Gonsalo Ximenes Plata (60).
Chetlatish: Akram Afif (87)
“Nasaf”: 35. Abduvohid Ne’matov, 5. G‘olib G‘aybullayev, 7. Akmal Mozgovoy, 9. Javohir Sidiqov (70. Jambuli Jigauri, 66), 17. Suhrob Nurulloyev, 28. Shuhrat Muhammadiyev (8. Zafarmurod Abdirahmatov, 46), 34. Sherzod Nasrullayev, 77. Oybek Bozorov, 88. Marko Stanoyevich (18. Bahrom Abdurahimov, 71), 92. Umarbek Eshmurodov, 99. Azizbek Amonov.
“As-Sadd”: 22. Meshaal Barsham, 5. Tariq Salmon, 6. Paulo Silva Otavio, 7. Muhammad Vaad, 9. Yusuf Abdurisag (11. Bag‘dod Buneja, 46), 10. Hasan Al Haydos (8. Ali Asad, 61), 15. Bulayim Huhi, 19. Gonsalo Ximenes Plata, 51. Akrom Afif, 70. Musaab Xidir (55. Amin Hazbavi, 46), 88. Andres Vilya Mateus.