Lionel Messi va Krishtianu Ronaldu Ispaniyada o‘n yil davom etgan raqobatni yuzaga keltirishdi va tez orada Saudiya Arabistoni maydonlarida o‘z janglarini davom ettirishlari mumkin. Quyida ushbu mulohaza haqiqatga yaqinmi yoki yo‘qligi xususida so‘z yuritamiz.
Messi Saudiya Arabistoniga yaqinlashadi
«Inter Mayami» hujumchisi Messi Saudiya Arabistoniga uchib ketishga, Saudiya klublaridan biriga ijara asosida o‘tishga yaqin. Messining jamoasi MLS pley-off bosqichiga chiqa olmadi. Endi ular uchun vaqtincha tartibda mavsum 21-oktyabr kuni «Sharlotta»ga qarshi o‘yindan so‘ng tugadi. Shu tariqa, 2022 yilgi jahon chempioni fevral oyining oxirigacha Florida jamoasida o‘ynamaydi.
Natijada, ikki tashkilot - Saudiya Arabistoni futbol federasiyasi va Saudiya davlat investisiya fondi Messi vaqtinchalik Yaqin Sharqda o‘ynay olishi uchun ehtimoliy kelishuv ustida ishlamoqda. Sky Sports muxbiri Rudi Galettining xabar berishicha, kelishuv Messiga futbolsiz bunday uzoq vaqtni o‘tkazib yubormaslik imkonini beradi. Jurnalistning ta’kidlashicha, bu harakat Devid Bekxemning 10 yil avval «Milan» va «PSJ»dagi qisqa o‘yinlariga o‘xshash bo‘ladi.
Yozda «Inter Mayami»ga o‘tishdan oldin Messida uchta variant bor edi: «Barselona» bilan qayta shartnoma imzolash, MLSga o‘tish yoki «Al-Hilol»ning foydali taklifini qabul qilish. Shubhasiz, u Mayamiga borishga qaror qildi, ammo bu Saudiya Arabistonining 36 yoshli futbolchi uchun qiziqishini yo‘qotganini anglatmaydi, aksincha.
So‘nggi kurash
Messi yana raqobat qanday ekanligini his qila olishi mumkin. Axir e’tibor bersangiz, MLSdagi individual kuchli futbolchilarning saviyasi Saudiya Arabistoni chempionatidagi futbolchilarnikidan pastroqdir. Qolaversa, Messi va Ronaldu uchun ham bir-biriga qarshi o‘ynash qiziqarli bo‘ladi - bu ikkalasi uchun ham futbolni yuqori saviyada yakunlash ajoyib bo‘ladi. Joriy mavsumda Ronaldu «An-Nasr» safida 8 ta o‘yinda maydonga tushib, 10 ta gol urdi va u faoliyatini yakunlash va taslim bo‘lish alomatlarini o‘zida ko‘rmayapti. U 41 yoshida Portugaliya terma jamoasi safida JCH-2026da o‘ynashni rejalashtirmoqda.
