Лионел Месси ва Криштиану Роналду Испанияда ўн йил давом этган рақобатни юзага келтиришди ва тез орада Саудия Арабистони майдонларида ўз жангларини давом эттиришлари мумкин. Қуйида ушбу мулоҳаза ҳақиқатга яқинми ёки йўқлиги хусусида сўз юритамиз.
Месси Саудия Арабистонига яқинлашади
«Интер Майами» ҳужумчиси Месси Саудия Арабистонига учиб кетишга, Саудия клубларидан бирига ижара асосида ўтишга яқин. Мессининг жамоаси МЛС плей-офф босқичига чиқа олмади. Энди улар учун вақтинча тартибда мавсум 21-октябрь куни «Шарлотта»га қарши ўйиндан сўнг тугади. Шу тариқа, 2022 йилги жаҳон чемпиони февраль ойининг охиригача Флорида жамоасида ўйнамайди.
Натижада, икки ташкилот - Саудия Арабистони футбол федерацияси ва Саудия давлат инвестиция фонди Месси вақтинчалик Яқин Шарқда ўйнай олиши учун эҳтимолий келишув устида ишламоқда. Sky Sports мухбири Руди Галеттининг хабар беришича, келишув Мессига футболсиз бундай узоқ вақтни ўтказиб юбормаслик имконини беради. Журналистнинг таъкидлашича, бу ҳаракат Дэвид Бекхэмнинг 10 йил аввал «Милан» ва «ПСЖ»даги қисқа ўйинларига ўхшаш бўлади.
Ёзда «Интер Майами»га ўтишдан олдин Мессида учта вариант бор эди: «Барселона» билан қайта шартнома имзолаш, МЛСга ўтиш ёки «Ал-Ҳилол»нинг фойдали таклифини қабул қилиш. Шубҳасиз, у Майамига боришга қарор қилди, аммо бу Саудия Арабистонининг 36 ёшли футболчи учун қизиқишини йўқотганини англатмайди, аксинча.
Сўнгги кураш
Месси яна рақобат қандай эканлигини ҳис қила олиши мумкин. Ахир эътибор берсангиз, МЛСдаги индивидуал кучли футболчиларнинг савияси Саудия Арабистони чемпионатидаги футболчиларникидан пастроқдир. Қолаверса, Месси ва Роналду учун ҳам бир-бирига қарши ўйнаш қизиқарли бўлади - бу иккаласи учун ҳам футболни юқори савияда якунлаш ажойиб бўлади. Жорий мавсумда Роналду «Ан-Наср» сафида 8 та ўйинда майдонга тушиб, 10 та гол урди ва у фаолиятини якунлаш ва таслим бўлиш аломатларини ўзида кўрмаяпти. У 41 ёшида Португалия терма жамоаси сафида ЖЧ-2026да ўйнашни режалаштирмоқда.
